نافذة دمياط نافذتك على أخبار وجديد محافظة دمياط
تعال هنا يأبو صوت مبحوح
بعد ماتخرخت من الجامعة كنت بدرس للطلبة وفى الوقت ده اتعلمت مهارة إزاى أتشقلب عشان أوصل المعلومة للطالب وحفظهاله عشان ينجح دول أمانة فى رقبتى و فى الوقت ده ربنا وهبنى ملكة توصيل المعلومة بسهولة ويسر فى النهاية مش كل من يمتلك علما يستطيع التدريس التدريس ده ملكة وعلم والمدرس الشاطر فعلا قادر لأما يحببك فى مادته أو حد مش شاطر يكرهك فيها . كنت كل مابروح بليل بسبب إجهاد أحبالى الصوتية بالله كنت بشاور مش بتكلم لو عاوز أشرب بشاور لأمى على بقى وأعمل نفسى بشرب ميه لو عاوز أكل بمثل إنى بأكل عشان أحافظ على الكام حتة اللى باقيين عشان بكرة لغاية مابدأت استخدم النباتات الطبية اللى هشرحها النهاردة ومن يومها البحة أختفت للأبد .
اسباب إلتهاب الحنجرة :-
١- بعض المهن زى التدريس والتجار اللى الزباين بينهدوهم فى الفصال ليل ونهار دول مش صوتهم بينبح لا وكمان بيجلهم إنهيار عصبى .
٢- ارتجاع المعدة والميكروب الحلزونى لو معدتك تعبانة بتأثر على جيوبك الأنفية والحنجرة والمرئ و أسنانك .
٣- البرد والتكييف والمروحة .
٤- المهندسين اللى عمالين يشمو رمل وأسمنت .
٥- التدخين سجاير وشيشة .
٦- العياط عمال على بطال .
٧- ضعف المناعة اصابة فيروسية او بكتيرية .
٨- شرب الشوربة مولعة نار ولا الشاى و لا القهوة اصبر اما يبردو شوية .
٩- قلة شرب الميه وجفاف الحنجرة .
طيب العلاج أيه :-
١- طبعا النجم نبات الينسون حبيب المغنين والمقرئين على حد سواء أم كلثوم كانت بتشربه قبل كل حفلة والشيخ عبد الباسط الله يرحمه كان لازم يشربه قبل كل قراءة للقرأن دا يحافظ على صوتك لو أكل عيشك الصوت .
٢- الزنجبيل :- بص دا وصفة متكاملة للقضاء على مشاكل الحنجرة وأحبالها الصوتية لأنه بيصلح صمام المعدة فيقف الإرتجاع و بيوقف الإلتهاب وبيقتل البكتريا والفيروسات سحر ماشاء الله .
٣- البامية والملوخية :- المواد الهلامية اللى بتزحلق دى بتعالج إلتهاب الأحبال الصوتية يبقى كل منهم كتير وممكن تنقع البامية كل يوم بليل وتشربها ع الريق زى ماشرحت قبل كده .
٤- شمع العسل :- هات الشمع واقعد امضغه زى اللبان رائع فعال جبار.
٥- القرفة :- ودى جميلة جدا جدا بتوقف الإلتهاب برضه وبترمم الأحبال الصوتية واشربها مع الزنجبيل .
فى النهاية لو أنت أكل عيشك أحبالك الصوتية حافظ على معدتك تكون سليمة و تجنب البرودة ألبس كوفية فى البرد و حافظ على شرب الزنجبيل بالقرفة بإنتظام واشرب ميه عشان تروى حنجرتك ومتنشفس.
شير لغيرك كله صوته مبحوح من البرد الأيام دى .
دمتم بصحة :heart:
