كاريكاتير نافذة دمياط

انسى يا عمرو … بعد خراب مالطا

بعد خراب مالطا
وبعد ما الحال وقف والدنيا باظت جايين يقولوا الخامات رخصت!
هو بعد العيد يتفتل كحك!
ولا على رأي المثل ” بعد خراب مالطا”
حوار ع القهوة النهاردة
-مساء الخير يا صاحبي
-مسا الخير والسعادة ع السكر الزيادة
واللي يشربها سادة ملوش مكان هنا
-ايه يا عم انت هتغني ولا ايه؟!
-ايوه يا عم “اغني واغني واغني كمان……
-طيب خير فرحني يمكن أغني معاك
-الخامات رخصت ونزلت ف الارض وهتروق وتحلى وتبقى عال العال مش قلتلك كل حاجة هتتعدل وبكره تروق وتحلى وبوجودك هتبقى أحلى وهنبقى “أد النيا”
-يا راجل الخامة رخصت!! ودي نعمل بيها ايه ما خلاص الورش قفلت بعد ما اتدينا لطوب الارض يا راجل دا انا عليا للقهوة اكتر من 1000 جنيه شاي وقهوة ومعسلة!!
جاي الوقتي تقولي الخامات رخصت وهتروق وتحلى!!
-ايه يا عم روق وهتبقى فلة
-فلة منين؟! طب فيه تاجر خامة هيديني قسط لغاية ما اطلع اعملي 4 صوالين وابعهم بسعر كويس؟
-لا طبعا انسى يا عمرو!!
-مش بتقول رخصت؟؟
-ايوة ما هي رخصت للي معاه واللي ممعهوش ميلزموش.

واللي زيي وزيك دول خلاص راحت عليهم

ننسى ان كان عندنا ورش وصنايعية فاتحة بيوت احنا نروح نرمي نفسنا ف البحر قبل ما يعملوه بفلوس .