نافذة دمياط نافذتك على أخبار وجديد محافظة دمياط
السناريست الدمياطى عمرو سمير عاطف ::
يكتب عبر الفيس بوك ::
بناءا على طلب المشاهدين
عجبه لص القبور من كفر دلهاب :
ازيك يا شيخ الخفر
انا عجبه حرامى القبور
حبيت اجيلك على طول قبل ما تعفن قبل ما الدود ياكلك وشكلك يتغير وتبقي زيك زي كل الميتين هيكل من عضم ما تفرقش عن حد حاجه الموت بعد شويه بيساوى بين الكل اجمل واحده فوق الأرض واقوى واحد.. تحت الأرض بيبقوا نفس الرمه بواقي ما تقدرش تفرقها من بعض
عارف
انا ياما بررت للناس حرفتى والناس لما بتسمع كلامى بتهز راسها وساعات تبتسم وتقول صحيح احسن ما يمد ايده ويسرق اللى لسه حي يا راجل ده انا ساعات كنت باحسسهم انى فخور بشغلتى
بس عمرى ما صدقت نفسي
في الاخر دى سرقه وانا حرامى وضميري مش عايز يرتاح بس الليله دى عايز اشكرك لانى اول مره ابقي حاسس انى المفروض احمد ربنا عشان بقيت حرامى قبور لو ما كنتش حرامى ما كنتش فتحت قبرك ماكنتش شفتك وانا باخد الخاتم الزمرد من ايدك وانت مش قادر تمنعنى
ههههه
فين الخفر ؟ فين الهيبه والجبروت فين سطوتك ؟ فين زعقتك اللى كانت بترج الأرض رج ؟
ده انا لسه سامع صوت رجليك وهى بتقرب منى لما كانوا بيعذبونى بامر منك في النقطة
ما تقدرش تقوم تلزق راسك اللى قطعوها دى وتمسك سيفك وتطيح في الكل ؟
ما تقدرش تمنع حرامى حقير زي من انه يسرقك ؟
ما تقدرش تهش الكلاب اللى عماله تنبح حوالين القبور ما تقدرش حتى تزيح التراب والدود عن جتتك وكفنك ؟
طب كان كله ليه بقي اذا كنت عارف ان دى اخرتك ؟
