ناس ماتت عشان تعبر .. وناس عاشت عشان تهبر

“ناس و ناس”

فيه ناس ماتت عشان تعبر.. وترفع يا بلدى اسمك

وناس عاشت عشان تهجر.. وتهبر وتنهش حتّة من جسمك

فيه ناس حاربت عشان عرضك.. روت من دمّها أرضك

وأدّت يا وطن فرضك.. بدون لحظة ما تتردّد

فيه ناس ماتت عشان مبدأ.. سنين بسلاحها فى الخندق

ومين ممكن يكون أصدق.. من اللى عشانك استشهد؟!

فيه ناس ماتت بلا زفة.. وسابت مصرنا واقفة

ولو اتحط فى الكفة.. بطل منها بجيش كامل

لا تعرف يعنى إيه تطبيع.. ولا معنى إنك إنت تبيع

تاريخ أمة خلاص بيضيع.. بوهم اسمه سلام شامل

فيه ناس قضت على الجبهة.. سنين مكويّة بلهبها

تاريخنا عمره ما جابها.. ولا سجّل حكايتها

لا سألت على مكاسبها.. ولا العيلة اللى هاتسيبها

ولا كانت بتحسبها.. وضحت راضية بحياتها

فيه ناس حاربت ومش عايزة.. ولا تكريم ولا جايزة

وقابلت ربها فايزة.. بجنّاته ورضوانه

وناس عاشت عشان تحرق.. وطن وفى ثروته تسرق

وتحزن حتى لو يغرق.. فلا عاشوا ولا كانوا

فيه ناس لاجل البلد صنعت.. ملامح نصر بيه رفعت

رقابنا فوق ولا طمعت.. فى نيل منصب ولا شهرة

فيه ناس لاجل البلد قاست.. وفوق المستحيل داست

وناس من بعدها عافت.. فساد فى أرضك الطاهرة

من الشهدا فى عبور الجيش.. إلى الشهدا فى طابور العيش

سنين وفاتت ما قدرتيش.. تصونى نصرك الغالى

فيه ناس سرقت ثمار النصر.. وباعت كل حاجة فى مصر

وخليتنا نعيش فى عصر.. مهيش بلدى ولا مالى

وأنا مالى وأنا مالى.

منقول