#اعرف_حقك ومستحقك عند الاستيقاف

لو انت ماشى فى ميدان سرور ولا عند البوستة ولا فى اى شارع من شوارع دمياط بتلاقى افراد بزى مدنى بتوقف وتقولك هات بطاقتك وعاوز يطلع على تلفونك الشخصى ده اسمه استيقاف تعالو ا نشوف ايه حكاية الاستيقاف ده من باب #اعرف_حقك الى اعدته المفوضية المصرية للحقوق والحريات واحنا ك#نافذة_دمباط بننقله لكل دمياطى عشان يعرف حقه ومستحقه
.
(س) و(ج) حول الاستيقاف في الشارع وتفتيش الهواتف دون سند قانوني: يعني إيه استيقاف ؟ وإيه حقوقك وواجباتك لو اتعرضت له من ظابط أو فرد شرطة؟.
.
بسبب توسيع دايرة الاشتباه بالتزامن مع قرب ذكرى أحداث معينة زي 25 يناير أو لسياسات أمنية معينة أي شخص ممكن يتعرض للتوقيف من الشرطة.. طب أيه اللى بيحصل ؟ ومدى قانونيته ؟ وحقوقي أيه وقتها ؟ وواجباتي أيه ؟
.
1- الاستيقاف هو إيقاف شخص بواسطة ضابط أو فرد شرطة أو حد من رجال السلطة العامة اللى لهم سلطة الضبطية القضائية لسؤاله عن اسمه ووظيفته وعنوانه ووجهته ومحل إقامته دون تقييد لحريته فى التنقل والحركة ودون استخدام القوة.
.
2 – الاستيقاف نوعين
– استيقاف للتأكد من الالتزام بتنفيذ أحكام القانون زي الكمائن المرورية
– استيقاف الاشخاص للاشتباه: وفي الغالب اللي بيتم هو النوع الثاني
.
3 – امتى ممكن الظابط يوقفني؟
القانون حدد حالة واحدة بس والحالة دي إن الشخص يحط نفسه طواعية واختياراً منه موضع الشك والريبة.
زي مثلا إنه يكون ماشى بالليل بيلعب فى كوالين العربيات المقفولة أو جنب أقفال المحلات المقفولة وبيحاول يفتحها أو شايل حاجات زى أجهزة كهر بائية وعمال يتلفت يمين وشمال
.
4 – طب أيه حقك وقتها ؟
من حقك تسأله عن تحقيق شخصيته وده حقك طبقا للمادة 24 مكرر من قانون الإجراءات الجنائية والتى أضيفت بالقانون رقم 174 لسنة 1998 والتى تنص على أنه ” على مأمور الضبط القضائي ومرؤوسيهم ورجال السلطة العامة أن يبرزوا ما يثبت شخصيتهم وصفاتهم عند مباشرة أي عمل أو أجراء منصوص علية قانونا …..”.
.
5 – هل من حقه يفتشك ؟ أو يشوف موبايلك أو اللاب توب بتاعك ؟
الاجابة لأ.. الاستيقاف مع توافر حالة الشك والريبة بيديله بس حق إنه يشوف تحقيق الشخصية بتاعك (البطاقة) ويسألك عن سبب وجودك فى المكان ووجهتك ايه.. أما تفتيشك هيحتاج إذن نيابة عشان يعمل كدة وموبايلك واللاب توب بتاعك بياخده حكم حرمة الحياة الخاصة اللى بيحتاج برضه إذن عشان يفتشها.. فمن حقك ترفض تفتيش شخصك أو موبايل لو مكنش معاه إذن.
.
6 – طيب تعمل أية لو فتشك بالقوة وخلى العساكر اللي معاه تمسكك وتفتشك بالعافية ؟
ج : فهمه أن ده أجراء خاطئ وغير قانونى ومش من حقه وماتحاولش تتعصب أو يصدر منك أي اعتداء عليه سواء بدني أو لفظي عشان مايعملكش محضر اعتداء على موظف عام وياخدها حجة للقبض عليك.
.
7- طيب لو أصر ياخدني على القسم وقالي أنه مشتبه فيا وهيكشف عليا ويسيبني لو مالقيش عليا حاجة ؟
من حقك ترفض ومش من حقه يعمل كدة لأنه صدر حكم المحكمة الدستور العليا بعدم دستورية الاشتباه كسبب للقبض على الأشخاص (حكم المحكمة الدستورية العليا فى جلسة 2/1/1993 برئاسة المستشار عوض محمد).
.
8 – طيب لو شتمونى وركبونى البوكس بالعافية وأخدونى ع القسم ؟
أنت من حقك تاخد إجراءات ضد ده وتعمل محضر للظابط تتهمه بالاعتداء عليك وتوقيفك فى غير الحالات القانونية وتفتيشك والقبض عليك بدون إذن نيابة وتقدر تقدم بلاغ للنيابة بده وتشتكي الظابط لرؤساءه وتشتكيه فى مكتب الشكاوى بوزارة الداخلية.