تربية

نحو تربية صالحة : *نداء لكل أم*

:+: قربي من بناتك وولادك وخففي همومهم
مش لازم تحلي كل مشاكلهم لو مش هتقدري، بس قولي كلمتين يخففوا

:+: قولي التعب كله بثوابه، الجنة مش ببلاش، مش لازم ناخد كل حاجة في الدنيا، قدامنا آخرة ربنا هيعوضنا بيها

:+: احكي قصص من حكايات السلف أد إيه اتحملوا الفقر والجوع والعيشة الصعبة علشان فيه آخرة مستنيينها

:+: علميهم إنها مهما ضاقت هتفرج وإن جزاء الصبر كبير أوي عند ربنا

:+: قولي لهم إنك حسة بيهم وبضيقتهم بس لازم نستحمل ونعيش علشان مقدمناش غير الصبر والدعاء لربنا

:+: علميهم إن الدنيا متستاهلش إننا نخسر آخرتنا عشانها

:+: شفنا الفترة اللي فاتت حالات الانتحار أو علي الأقل التفكير فيه، وده الظاهر لنا وطبعا ما خفي كان أعظم، متفكروش الناس دي بعيدة عننا، لأ ده في لحظة يأس ممكن أي إنسان يوصل للمرحلة دي ويكون من أقرب الناس لينا

:+: قوليلهم اوعوا تفتكروا ان اللي بيموت منتحر ده بيرتاح وخلاص كده انتهى تعبه بالعكس النبي صلى الله عليه وسلم «مَنْ قَتَلَ نَفْسَهُ بِحَدِيدَةٍ فَحَدِيدَتُهُ فِي يَدِهِ يَتَوَجَّأُ بِهَا فِي بَطْنِهِ فِي نَارِ جَهَنَّمَ خَالِدا فِيهَا أَبَدا. وَمَنْ شَرِبَ سَمّا فَقَتَلَ نَفْسَهُ فَهُوَ يَتَحَسَّاهُ فِي نَارِ جَهَنَّمَ خَالِدا مُخَلَّدا فِيهَا أَبَدا. وَمَنْ تَرَدَّى مِنْ جَبَلٍ فَقَتَلَ نَفْسَهُ فَهُوَ يَتَرَدَّى فِي نَارِ جَهَنَّمَ خَالِدا مُخَلَّدا فِيهَا أَبَدا».يعني هيفضل يتعذب بالحاجه اللي موت نفسه بيها الي ان يشاء الله .

:+: أي معلومة تعرفيها تقرب لربنا انشريها، علميها اللي حواليكي متقوليش أنا مالي كل واحد يتحمل نفسه

:+: كل واحد وواحدة فينا مسؤول جزئيا عن الحال اللي وصلنا له، كله بقى همه على نفسه ويقول أنا مالي

:+: يا جماعة مجتمعنا وصل لمرحلة وحشة والله، بالرغم إن مش هننكر وجود بعض الخير والعمل الصالح بس الضياع والفساد أكتر

:+: لبس البنات، شكل الشباب، طريقة الكلام والألفاظ، الأولويات في حياتنا، العيب من اللي مش عيب، الصح والغلط…. كل حاجة اختلفت واتغيرت
كله لازم يبدأ، نبدأ ببيوتنا وولادنا وبناتنا، نعلم الصح والغلط، الحلال والحرام، نعلم ولادنا احنا ليه مخلوقين وحجم الدنيا في حياتنا مفروض يبقى إيه، ونعظم أمر الآخرة في نفوسهم

:+: مش لازم نقول كلام كتب ونرص رص، لأ بمنتهى البساطة زي م أمهاتنا وجداتنا زمان كانوا بيربوا ويعلموا

:+: ونفتكر كلنا “كلكم راع وكلكم مسؤول عن رعيته” يعني مش هتيجي قوة خارقة تغير من حالنا لأ… احنا اللي لازم نبدأ بنفسنا

:+: أسأل الله الكريم أن يهدي شباب وبنات المسلمين ويحفظهم ويجنبهم الفتن ما ظهر منها وما بطن

#نصائح_تربويه