نافذة دمياط نافذتك على أخبار وجديد محافظة دمياط
عايزين تعرفوا احنا وصلنا لفين ؟؟
اسمعوا الحكايه دى وشوفوا الفيديو وانتوا تعرفوا وصلنا لفين
روحت المستشفى التخصصى بدمياط ( مستشفى حكومى ) علشان بس اقيس الضغط لأنى تعبان جدا وبغض النظر عن ان دكتور الأمتياز قاسه ١١٠/٧٠ وقالى انه واطى وهو اصلا ١٦٠/١١٠ عند اتنين مختلفين بعده ( يعنى كان ممكن يموتنى لو سمعت كلامه ) ودا عادى يعنى
المهم خلينا فى الأهم
دخل واحد عاجز على كرسى متحرك وصفه كالآتى (( ٥٠ سنه تقريبا ،مشلول ، عنده السكر ، مش بيعرف يتكلم كويس ، رجليه وارمه جدا ، حمراء من الألتهاب ومليانه قرح صديديه والذباب بيعف عليها ))
منظر يقطع القلب
المهم
عايز حد بس يغيرله على جروح رجليه اللى هو طبعا ميقدرش يوصلها
الدكتور ( النبطشى الأمتياز المنطط ) بعد ما اهمله لفتره
الدكتور>عايز ايه يا راجل انت ؟؟
عم متولى>عايز بس حد يغيرلى على رجليا يا دكتور
الدكتور>مفيش هنا غيارات احنا استقبال بس تعالى الصبح بدرى الساعه ٩ وهما يغيرولك
عم متولى>بيسترجاه امى وابويا ميتين ومش متجوز ولا عندى عيال ومفيش حد يغيرلى عليها
الدكتور>قولتلك مفيش غيارات ومتقرفنيش بقصة حياتك
عم متولى> وحياة اغلى حاجه عندك يا دكتور علشان خاطر النبى
الدكتور>امشى يا راجل انت من هنا
عم متولى>طيب فى صيدليه عطيانى الشاش والبتادين ممرضه بس تغيرلى من عندكم
طبعا كل الناس ( دكاتره ، ممرضات ، عيانين ، أمن ) واقفين يتفرجوا بدون ادنى رد فعل
انا بقى > طيب يا ممرضات حد يغيرله على حسابى واللى انتوا عايزينه وبزياده
الممرضات> ملناش دعوه القانون بيقول لأ يروح اى وحده صحيه يغيروله و (بعدين دا شكله يقرف )
انا > وحده صحية ايه بس يا جدعان دا مشلول !!!
الممرضات> اللى خلاه يجى هنا يروح الوحده الصحيه !!
مفيش رحمه
الدكتور> بكل حزم نادى الأمن ((شيلوا الراجل ده ارموه بره ))
انا > بره ازاى بس !؟ مش دى مستشفى ودا مريض ايه مفيش رحمه
الدكتور > مش عاجبك غيرله انت
انا> وماله هاتولى جوانتى
الدكتور> بس دا يبقى بره مش عندى هنا
انا > بره فين ؟؟
الدكتور > بره المستشفى على اى جنب
وطبعا اترمينا بره
وانا اخدت الراجل فى استراحة استقبال المستشفى التخصصى وغيرتله على جروحه وقصيتله ضوافر ايديه ورجليه اللى تعباه ومش لاقى حد يقصهاله
طبعا الراجل وانا بغيرله وهو بيدعيلى بكل الأدعيه اللى يعرفها وبيشتم فى المستشفى
وبعد ما خلصنا وروقت عليه صورته وهو فرحان وبيضحك والخلفيه (( استقبال المستشفى التخصصى ))
طبعا انا صورت اللى حصل فيديو وهنشره هنا وعايزكم تشيروه فى كل مكان
يمكن نقدر نغير حاجه
الناس دى مش بتخاف غير من الصوت العالى
اى واحد فينا لا قدر الله ممكن يبقى مكان عم متولى
ساعدونى البوست دا يوصل ل (( انسان )) مسئول
يقدر يعاقب المقصر ويغير الهبل ده
مصر فيها مليون (( عم متولى ))
واكتشفت كمان للأسف ان فيها ٥٠ مليون (( زومبى )) احياء اموات انتزعت منهم الأنسانيه ( مش هقول دين ولا اخلاق ولا توجه سياسى )
بقول ((( انسانيه ))) فقط
( الكفار ) بره بيعالجوا حيوانات الشوارع المصابه
واحنا هنا بنرمى (( الأنسان المريض الغلبان بره ))
منقول
