رئيس هيئة الأرصاد يحذر من غرق الاسكندرية والدلتا ..

امبارح نزل خبر من رئيس هيئة الأرصاد بيحذر فيه من غرق اسكندرية والدلتا وطلب من الحكومة التصدي للمشكلة وردم الشواطئ بميل محدد 3-5 متر وفى الحال مواقع الاخبار وبيدجات اسكندرية نقلوا الخبر واتكلموا عنه , وبين مؤيد ومعارض وناس بتهزر وناس خايفه محدش حاول يوضح اللي بيحصل والمفروض الناس تعمل ايه بالظبط عشان تبدأ تاخد احتياطاتها بدل حالة الذعر اللي انتشرت بين الناس وخلاص .. 
اولاً لازم كلنا نبقى فاهمين ان رئيس هيئة الارصاد مقالش حاجة جديده , حكومتنا للأسف كانت معارضه كلام الباحثين والعلماء اللي حذروا العالم كله مش مصر بس من ارتفاع منسوب المياة ولما طلع تقرير ناشونال جيوغرافيك لمصر بيحذروا فيه من غرق اسكندرية وزارة البيئة بدل ماتبحث اكتر وتتأكد ان كان ده هيحصل ولا لا قالت انه كلام غير صحيح وبالتالي الناس مهتمتش بالموضوع بس عموماً لا تبكي على اللبن المسكوب وتقرير ناشونال جيوغرافيك مش التقرير الوحيد اللى ترفضه مصروالكلام ده من 2009وكدة كدة لازم تكونوا فاهمين ان الحكومة نفسها مش هتقدر تمنع الكارثة..

ثانياً لازم تبقى فاهم الفرق بين التسونامي وارتفاع منسوب المياة في البحر 
التسونامي بيحصل في المحيطات وبيكون عبارة عن سلسلة من موج البحر السريعة جدا والقوية اللي بتحصل بسبب الزلازل او ثورات البراكين ولما بيحصل التسونامي احياناً مبيبقاش في أي انذار والامواج دي بسبب قوتها ممكن تشيل صخور وزنها 20 طن مثلاً وتوصلها لإمتداد 20 متر , اما ارتفاع منسوب المياة فامش بيسبب اكتر من فيضانات بمعنى ان البلد المتضررة بتدخلها المية وتبدأ تغمرها وتملاها ويوصل مستوى المية لإرتفاعات عالية جدا .. وده بيحصل بسبب الاحتباس الحراري وذوبان الكتل الجليدية في القطبين واكيد التغيرات المناخية الشديدة اللي بدأت من شتاء 2013 تقريباً تزيد.. وارتفاع منسوب المياة بيبقى ليه طبعاً مقدمات والمقدمات احنا بنعيشها من بداية السنة اللطيفة دي , النوة اللى فاتت دي هي اللى وضحتلنا ان المشكلة بقت قريبة مننا جدا ولازم على الاقل نبقى مستعدين ليها
*ملحوظة هامة : حصل فى اسكندرية تسونامي زمان لكن حالياً المشكلة فى ارتفاع منسوب المياة فقط

*سنة 2009 اتنشر تقرير بعد مؤتمر التغيرات المناخية واثرها على مصر , في القاهرة أكد فيه د.كمال طلبه خبير البيئة والأراضي في مصر ان البحوث المحلية والدولية اكدت زيادة مستوى البحر,40% على الاقل من اراضي اسكندرية والدلتا معرضه للغرق في 2050 , وبعد تصريح هيئة الارصاد الناس تداولت معلومة فكرة الغرق سنة 2050..

1-ياترى فعلا الموضوع ده مش هيحصل قبل سنة 2050؟
الاجابة لا , عالم المناخ وأخصائي علم المحيطات في معهد بوتسدام في المانيا ” ستيفان رامستورف” قال فى مقابلة صحفية من سنة 2008 ان بمجرد مايبدأ مستوى سطح البحر فى الارتفاع هيبقى مستحيل نوقفه ومنقدرش نتوقع ان كان الموضوع هيحصل بسرعة او لا والحاجه الوحيدة اللى نقدر نعملها اننا نوقف انبعاثات الغازات الدفيئة اللى بتغذي الاحتباس الحراري وساعتها ممكن ” ممكن ” نقدر نسيطر على مستوى سطح البحر وتوقع ان مستوى البحر يزيد بمعدل 1.1 مل او 0.55 مل في السنة وقال ان كل الارقام اللي بيطرحها العلماء مجرد توقعات مبنية على دراساتهم وبحوثهم مش اكتر والحاجة الوحيدة اللى ممكن تعجل بالكارثة هي تسارع الاحداث والتغيرات المناخية ,وطبعا الكلام ده من 2008 ومحدش اتحرك من 2008 ومستوى زيادة سطح البحر حسب تقارير ناسا وصل 3.2مل في السنة في أغسطس 2017بس !
يعني وصل لمستوى أعلى واسرع من المتوقع أصلاً !
ده غير ان في تقرير لناسا سنة 2015 ” مصدر فى اخر المقال ” بيقول ان مستوى سطح البحر بيزيد اسرع من كل توقعات العلماء .

2- مصر بس اللي هتتأثر باللي بيحصل ؟!
فى بلاد كتير هتتاثر بارتفاع مستوى المياة في البحار والمحيطات والانهار, ده اكيد مش بس مصر , المانيا مثلاً بقالها يومين منسوب المياة فى نهر الراين بيرتفع اسرع من المتوقع والنهر فاض على الضفتين , وقال هينينغ فركر من هيئة الفيضانات المحلية ان الراين بيرتفع بمعدل 3 سم كل ساعة 
ومش بس المانيا كمان المغرب وكل المدن الساحلية للبحر المتوسط ومنخفضة !

3- ايه هي المحافظات اللى مهدده بالغرق ؟!
البداية هتبقى بـ 
اسكندرية , البحيرة , بورسعيد , راس البر , دمياط
وبعدها باقي محافظات الدلتا .

4- ممكن في النوات الجاية البحر يشكل خطر على المحافظات دي ؟!
ده شيء متوقع جدا , من 3 او اربع ايام خلصت موجة طقس عنيفة 
وبرغم انها خلصت الا ان البحر لسه بيمتد على الشواطئ في اسكندرية وراس البر ودمياط ومنسحبش والنوة الجاية قريبة .

5- في ايدنا ايه ممكن نعمله ؟ نهرب ؟!
ممكن نقول كلام الخبراء في امريكا اللي بيقولوه للمواطنين بسبب التغيرات المناخية العنيفة اللى بيمروا بيها من السنة اللى فاتت : 
” كونوا مستعدين للهرب في أي لحظة لأكثر منطقة آمنة وقوموا بتخزين المياة والطعام وخصوصاً المعلب والحبوب “

6- مش يمكن كل دي مبالغات ؟!
طب عندك فكرة ان اكتر من 85% من خط الساحل في رشيد بيختفي كل سنة من سنة 1989؟ 
عندك فكرة ان سوزان خليف من المعهد الوطني لعلوم المحيطات سنة 2010 قالت ” التغير المناخي يحدث اسرع مما كنا متوقعين وفي عملي انا هناك تغيير رهيب وملحوظ ,في يوم من الأيام ستحدث كارثة لكن متى وكيف وأين لا نعرف بعد , لكن يجب ألا ننتظر إلى ان تاتي وتطرق الباب لكي نتحرك ” ؟
عندك فكرة ان 16 الف عالم في 15 نوفمبر 2017 نشروا تحذير للبشرية بسبب تغيرات المناخ ؟ 
في ايدك تتجاهل اللى بيحصل وكأن شيئاً لم يكن وفى ايدك تاخد احتياطك وتكون بس مستعد لأي حاجه ممكن تحصل في اي وقت .

{ تعديل رداً على الاسئلة }:- 
هل الغرق هيكون زي اللي في الصور ولا هتغرق تماماً؟ 
– الغرق هيكون فى البداية زي اللي في الصور وده هيسبب مشاكل كتير وكوارث اكتر اكيد زي ( انقطاع الكهرباء – توقف الصرف الصحي – حالات الغرق – تآكل المنازل وهدمها , إلخ)
وفي خلال 60 سنة على الاقل ممكن تختفي اسكندرية ومحافظات الدلتا تماماً والله اعلم
وده طبعاً كلام د.علاء النهري نائب رئيس المركز الاقليمي لعلوم الفضاء في الامم المتحدة وممثل مصر في لجنة الاستخدام السلمي للفضاء وقال بالتحديد ان محافظات الدلتا واسكندرية هتختفي من على الخريطة فى حلول عام 2075 .

وأخيراً , نسأل الله العفو والعافية وأكثروا من قول 
اللهم ابعد عنا كل سوء واصرف عنا كل شر اللهم احفظنا واحرسنا بعينك التي لا تنام وأكنفنا بكنفك الذى لايُرام … اللهم آمين.
*الصور المرفقة أرشيفية من اسكندرية 2015
#يارا_عمر 
مصادر:
http://cnn.it/2hzR4UK
http://bit.ly/2qF7cs4
http://bit.ly/2D57LxZ
https://go.nasa.gov/2lnBkVP
http://bit.ly/2m64NRx