لا للتحرش
لا للتحرش

حبس شيخ تجرد من إنسانيته فتحول لذئب بشري وهتك عرض طفلة سنها 10 سنوات بالدقهلية بعد درس لتحفيظ القرآن

‎حبس إمام مسجد بالدقهلية تحرش وهتك عرض طفلة ١٠ سنوات داخل منزله بعد درس تحفيظ القرآن في ,والطفلة لم تخبر الام فورا لكن بعد رفض الطفلة للذهاب للدرس إستدرجتها الام حتي عرفت منها ما حدث وقامت بالابلاغ عنه وإعترف قائلا :‎”لم يتعد الأمر سوى التلامس والقبلات فقط دون وجود أي علاقة جنسية.” ‎ومن ناحيته أكد الطبيب الشرعي بالكشف المبدئي تعرض الطفلة لاعتداء جنسي حديث .

نصائح للوالدين :

ماتقفلوش الباب ع ولادكم وانتوا مش معاهم لا مدرسين ولا قرايب ولا شيوخ ولا كهنه ولا اصحابهم ولا اصحابكم وصاحبوا ولادكم وطمنوهم من ناحيتكم عشان يرجعولكم لما يحصل اي حاجه… وعرفوهم ايه المناطق اللي ماينفعش حد يلمسها في جسمهم ولو حصل يبعدو ويصرخو ينادوكم ويحكولكم وانتوا تقفوا جنبهم وتبهدلوا اللي عمل كده قدامهم وبلغو عنه عشان يتطمنوا ليكم بعد كده ومايقعش تحت تهديد وابتزاز المتحرش خوفاً منكم.. دي حاجات عن التوعية الجنسيه للاطفال لازم تخلو بالكم منها :

١-ليه مهمه؟ -عشان نحميهم من التحرش والاستغلال -عشان نرضي فضولهم احنا ونعلمهم صح ونعرفهم ع جسمهم واللي بيحصل فيه ولو احنا مافهمناش اطفالنا كل ده هيروحو لحد تاني يفهمهم ووقتها ممكن يستغلهم او يقولهم معلومات غلط وكمان هما كده شايفين اننا بنقول عيب ونزعق يبقا هيخبو علينا ويخافو يحكولنا اللي بيحصل معاهم ووقتها بندي فرصه للناس تآذيهم وتبتزهم .

٢- امتي نبدا؟ -الطفل من وهو عمر يوم وطول ما هو لسه مش واعي وكبير كفايه انه يعتمد ع نفسه ويعرف يتكلم ويحكيلنا احنا مسؤولين عن حمايته بالكامل فاللي هنعمله هيكون اننا: -مانغيرش للطفل قدام حد ولا نخلي حد غيرك انتي وباباه وبالكتير جدته يغيرله -مانسيبش الطفل مع حد من غير ما نراقبه كويس حتي لو وسط اطفال وعيلتكم -نخلي بالنا من ايه اللي ولادنا بيشوفوه سواء ع التليفزيون او مننا ك اباءهم -لو الطفل سأل عن المناطق الحساسه في جسمه او بيلمس نفسه نرد بوضوح ومانزعقش فيه ومانقولش عيب ولا نعنفه. -لما يكون خلاص بقا عارف يتكلم وهيبدا يروح حضانه او مدرسه بعيد عننا نبدا نقوله ايه المناطق اللي في جسمه لما حد يلمسها يقول لا ويزعق ويبعد عنه ويروح لحد من المدرسين يقوله ولما يرجع البيت يقولكم ولو الحد ده هدده وقاله ده سر او ماتقولش لحد او لو قولت لحد هضربك برضو يقولكم وانتو هتحموه منه وانه مايخافش منه ابدا وانتو هتكونو معاه. -نعلمه ايه اللمسات الآمنه زي مثلا ان حد يسلم عليه او مامته او باباه يحضنوه ويبوسوه من خده او راسه او ايده -ونعلمه ايه اللمسات الشريره او غلط زي حد غريب يبوسه او يلمس المناطق الحساسه عنده ونشاور علي المناطق دي مثلا بعلامه حمرا او نوريه كارتون توعيه يثبت في دماغه اكتر ونعلمهم زي ما ممنوع حد يلمسنا في المناطق دي ممنوع احنا كمان نلمس المناطق الحساسه دي في الناس اللي حوالينا. -ارجوكم بلاش ثقه زايده في اللي حوالينا حتي لو من عيلتنا ماحدش عارف الناس جواها ايه الفتره اللي فاتت حوادث اغتصاب وتحرش بالاطفال من اقاربهم واطفال زيهم كمان نخلي بالنا منهم ونعلمهم ازاي يدافعو عن نفسهم ونعلمهم رياضه يقدرو يدافعو بيها عن نفسهم. -ومهم كمان نحترم رغبه ولادنا لو جينا نبوسهم او نحضنهم وهما ماكانوش حابين ده دلوقتي مانبوسهمش غصب عنهم عشان يعرف ان لا يعني لا وماينفعش يتغصب ع حاجه زي دي.

ملف صوتي توعوي للاسرة والوالدين لحماية أطفالنا من التحرش