تلخيص كتب: كتاب (التأثير المركب – Compound Effect)

كتاب the compound effect مترجم pdf (تلخيص)

تالت كتاب معانا فى سلسلة مقالات تلخيص الكتب واللي هدفها اننا نلخصلك أحسن كتب فى أكتر من مجال، ومن أعظم الخبراء فى مجالات مختلفة تهمنا كلنا، يعنى لو انت مش بتحب تقرأ يبقى لازم تتابع الفقرة دي وتطبق المعلومات اللى فيها عشان هتوفر عليك كتير.

قبل ما نبدأ في ملخص كتاب النهارده خليني أسألك سؤال:

لو إنت عندك خيار من اتنين، الخيار الأول انك تاخد 3 مليون دولار دلوقتي حالًا.
والخيار التاني انك تاخد سنت واحد بما يعادل القرش المصري (السنت ده قيمته 1/100 من الدولار) السنت ده لو قولتلك ان قيمته هتضاعف كل يوم لمدة 31 يوم وبعد نهاية المدة دي هتاخد المبلغ النهائي كامل.

يا ترى هتختار أي اختيار فيهم!؟

قبل ما تكمل قراءة اكتب الاختيار اللي اختارته تلقائيًا، وبعدين كمل قراءة وخلال قرائتك فكر هل انت لسه مقتنع باختيارك وكان اختيار صائب ولا لاء؟

احنا دلوقتي بقينا عايشين في عصر السرعة كل حاجه عايزين نوصلها بشكل سريع جدًا.
الكاتب بيسمي ده عقلية المايكروويف – Microwave Mentality ومعناها انك زي المايكروويف لما بيسخنلك الاكل في 30 ثانية أنت بتبقى عايز توصل لكل حاجه بشكل سريع جدًا.

فمثلًا لو عايز تاكل هتدخل على ابلكيشن و تدوس على زرار ويجيلك الاكل لحد عندك أو لو عايز تشتري حاجه هتدخل على موقع زي امازون مثلًا وتطلبها بتوصلك لحد باب بيتك من غير أي مجهود منك، والأمثلة من دي كتير.

الاسلوب ده في الحياة بيخلينا دايمًا مستعجلين وبندور على النجاح بشكل سريع جدًا، بيخلينا نفكر في النتائج الفورية – Immediate Results
زي انك مثلًا تخس ويكون عندك جسم رياضي أو انك تكون شخص غني أو ان يكون عندك قناة يوتيوب ناجحة أو انك تتعلم مهارة معينة أو ان يكون عندك مشروعك الناجح.

كل الحاجات دي بتاخد وقت وعلشان تقدر تبقى فعلًا انسان ناجح لازم تاخد خطوات صغيرة، الكاتب بيسميها التأثير المركب – The Compound Effect
وده عبارة عن الخطوات الصغيرة أو القرارات الصغيرة اللي انت بتاخدها في حياتك بشكل يومي، وبتبني بيها عادة بتأثر عليك على المدى البعيد. الأشياء الصغيرة اللي انت بتعملها دي ممكن مايبانش تأثيرها دلوقتي حالًا لكن بيبان تأثيرها بعد فترة طويلة، والتأثير ده بيكون كبير جدًا أكبر من اللي انت كنت متوقعه ونتايجه بتكون أكبر بكتير من انك تحاول تتغير بشكل سريع.

لو رجعنا للسؤال اللي سئلناه في أول المقال:

تخيل ان انت وصاحبك كنتوا في الموقف ده وصاحبك اختار الـ 3 مليون دولار وانت اختارت انك تمشي مع الاختيار التاني
لو انت وصلت لليوم 21 هتلاقي السنت اللي انت بدأت بيه في أول يوم اضاعف لحد ما وصل ل 5,243 دولار الرقم ده يعتبر لسة قليل جدًا مقارنة بال 3 مليون دولار اللي صاحبك اخدهم لكنك لما استنيت لليوم الـ 31 اخدت 10,737,000 مليون دولار يعني انت اخدت اكتر من 3 اضعاف اللي صاحبك اخده.

خلينا ناخد مثال تاني، لو انت وصاحبك بتتفرجوا على قناة جيل يقرأ واتحمستوا ان انتوا تبدأوا قراءة من تاني.
انت بدأت تقرأ كل يوم 10 صفحات بس أما صاحبك فكان متحمس جدًا وقرر انه عايز يقرا 100 صفحة في اليوم، لو افترضنا ان عدد الصفحات في الكتاب الواحد 300 صفحه ده معناه انك هتخلص كتاب واحد في الشهر فقط بينما صاحبك هيخلص كتاب واحد كل 3 أيام. لكن على المدى الطويل بعد سنه أو سنتين هتلاقي إن عدد الكتب اللي انت قريته أكبر بكتير من الكتب اللي صاحبك قرأها وده ببساطة لإن صاحبك قرر يتغير مرة واحدة.

التغيير المفاجئ لأي إنسان مش بيخليه يقدر يستمر في التغيير ده لإن الإنسان هو أسير للعادات بتاعته وبالتالي صاحبك اللي كان متعود مايقراش أي كتاب خالص وقرر مرة واحدة إنه يقرأ 100 صفحة في اليوم هيعاني جدًا إنه يحافظ على العادة دي، والمعاناة دي هتخليه بيحس إنه مع الوقت مش قادر ينتظم في القراءة، وممكن يبطل القراءة خالص بسبب إنه مش قادر يحقق العادة دي.

أما أنت على عكس صاحبك بالرغم ان ممكن تلاقي صعوبات في انك تتغير وتحاول تقرأ في اليوم 10 صفحات إلا إنك هتحقق مع الوقت عادة القراءة، وهتقدر تزود عدد الصفحات اللي انت بتقراها وبالتالي على المدى الطويل هتقرأ عدد كتب كتير جدًا أكبر من العدد اللي هيقراه صاحبك.

التأثير المركب ممكن يشتغل معاك بشكل إيجابي أو شكل سلبي، وعلشان كده لازم تاخد بالك من الحاجات الصغيرة اللي انت بتعملها كل يوم، وده بيتم عن طريق انك تعمل حاجه بتسمى

تتبع عاداتك – Tracking Your Habits:

بمعنى انك تكتب كل يوم لمدة 21 يوم ايه اللي بيحصلك في اليوم بالظبط وتعرف ايه العادات السيئة اللي انت بتعملها يوميًا، واللي انت تقدر تغيرها وتبدلها بعادات كويسة تساعدك تتحسن على المدى البعيد.

الطريقة دي بيتبعها الكاتب واثبتت فعاليتها في الناس اللي بيحاولوا يخسوا لان الدراسات بتقول ان الناس اللي بيكتبوا الحاجات اللي بياكلوها كل يوم بتساعدهم بشكل كبير إن هم يخسروا وزنهم بشكل أكبر.

في الختام نقدر نلخص اللي اتعلمناه من كتاب النهاردة في أربع سطور:

  1. انك لازم تتخلى عن عقلية المايكروويف وتفكر بطريقة التأثير المركب.
  2. التأثير المركب بيديك نتائج كبيرة جدًا على المدى الطويل.
  3. علشان تقدر تطبق التأثير المركب لازم تتبع العادات بتاعتك، وتبدأ تكتب الحاجات اللي بتحصلك لمدة 21 يوم على الأقل وتعرف ايه العادات السيئة اللي بتعملها وتبدلها بعادات كويسة.
  4. لو اتبعنا طريقة الخطوات الصغيرة في حياتنا، إننا نعمل خطوات صغيرة يومية تساعدنا اننا نوصل للهدف اللي احنا عاوزينه على المدى البعيد ده هيكون افضل بكتير، ومردوده هيبقى أعلى بكتير من إننا نحاول نتغير مرة واحدة.

منقول (نادي القراءة العملية )