نافذة دمياط نافذتك على أخبار وجديد محافظة دمياط
كنا ف الورشة نتلم حوالين الغراية ندفا حواليها واللي في الصيف محدش بيهرب ناحيتها محبوبة الصنايعية في الشتا نقفل باب ورشتنا علينا ونشتغل يا دوب نخرج نصلي ونرجع طيران واللي عايزنا يخبط على باب ورشتنا ومن كتر الشغل ممكن نسهر شويتين اونال ايه اكل العيش يحب الخفية وقبل ما نقفل نطلع ع الفوال حبة فول على طعمية وشوية مخلل وحتتين لفت م اللي قلبك يحبهم ونفوت ع البقال ربع رومي وربع تلاجة وكيس كيزر عشان مدارس الولاد الصبح ويا سلام لو شوية فول سوداني سخنين من المحمصة اللي جنب البقال مع شوية سحلب وتفوت ع الحاجة ربنا يعطيها الصحة والعافية ويشفيها ويشفي كل مريض يا دوب تسمع خطوتك تناديك قبل ما تخبط ع الباب تعالى يا حبيبي شوية لبن سخنين يدفوك م البرد والزمهرير تعالى يا حبيبي ولما تشوف السحلب تقولك يااااااه الله يصلح حالك ويروق بالك كان نفسي اطلب منك حبة سحلب طول عمرك عارف وفاهم زي ابوك الله يرحمه ويحسن اليه
واحلى شوية سحلب بالجوز والقرفة من ايدين الحاجة مع صوت تقشير السوداني واحلى صحبة ويتلم اخواتك واولادهم واخواتك الصغيرين ويتحول البرد بقدرة قادر لضحكة كبيرة وحكايات وتحس بالدفأ في عز البرد وضحكة الام ترد الروح وتسعد اوقاتك واوقات اللي حواليك
وحشتنا اللمة الحلوة
يا رب رد كل غايب ورد كل مسافر
واشفى كل مريض
وبارك في اللي علمونا وكبرونا
