نافذة دمياط نافذتك على أخبار وجديد محافظة دمياط
السيدة التى أسقطت عرش YAHOO
الست اللي في الصورة دي جابت #ياهوو الأرض …
دي “ماريسا ماير” الرئيسة التنفيذية لياهوو سابقا من سنة ٢٠١٢، كانت من أول ٢٠٠٠ موظف في جوجل وكانت متميزة وإتصنفت في المركز الثامن للنساء الأكثر نفوذا .. لكن من ساعة ما راحت ياهو في ٢٠١٢ والدنيا اتقلبت ع دماغها.
شركة الإتصالات الأمريكية Verizon بتخلص في صفقة الاستحواذ على ياهوو بمبلغ ٤.٨٨ مليار دولار وهتغير اسم ياهوو لـ ” ألتابا Altaba “مع إستقالة “ماريسا ماير” وبكده ياهوو إنتهت تماماً !
إيه الأخطاء اللي وقعت فيها ماريسا ماير في الخمس سنين اللي مسكت فيهم ياهوو وقضت بيها على أسطورة ياهوو !! ؟؟ …
1. عدم مواكبة التطور والمنافسين
نفس الخطأ اللي وقعت فيه نوكيا بعد ما ياهوو كانت واحدة من عمالقة الإنترنت لكن للأسف بدأت تنهار واحدة واحدة والكلام ده من قبل ما “ماريسا ماير” ماتيجي .. بس هى لما جت كملت على الشركة …
ماريسا إنشغلت وركزت في تقليل مصاريف ياهوو ونسيت إن المنافسين بيجروا بسرعة البرق زي جوجل ومايكروسوفت اللي مولعين فبعض ، وطبعا نتيجة لده تطوير خدمات ياهوو الأساسية زي البحث والإيميل والأخبار بقى بطئ جداً ، حتى المميزات الجديدة بقت ياهوو تنزلها بعد المنافسين بفترة .. دا غير الإختراقات اللي حصلت لحسابات المشتركين.
2. عدم الاهتمام بالموبايل
واحد من أكبر الأخطاء الكارثية اللي أدت مباشرة لسقوط ياهوو عدم إهتمام “ماريسا ماير” بالهواتف الذكية في نفس الوقت اللي الكل فيه كان بيتجه لإهتمام إستخدام الموبايل والعمل على تطويرة لأنهم شافوا فيه المستقبل أكتر من ٧٠٪ من زيارات الانترنت دلوقتي من على الموبايل!
“ماريسا ماير” تجاهلت تماماً تطوير خدمات ياهوو على السمارت فون .. وده كان سبب رئيسي من أسباب سقوط ياهوو على جدور رقبتها
3. تجاهل الفرص
الخطأ الكارثي التاني اللي عملته “ماريسا ماير” هو الانسحاب من السوق العربي بعد ماقفلت موقع ومدونات مكتوب في ٢٠١٣ وخرجّت ياهو بره السوق ده تماماً او ع الأقل قللت إهتمامها بيه .. في حين إن السوق العربي من أكتر الأسواق سرعة في التطور وجوجل من أكبر المستثمرين فيه
4. سقوط الميزة التنافسية
ياهوو في فترة من الفترات كانت الأولى في محرك البحث، البريد الالكتروني، مصدر الأخبار والمحتوى.. كل الخدمات دي كانت ميزات تنافسية وقيمة كبيرة اوي عند ياهوو مقارنة بالمنافسين…
الأخبار والمحتوى سقط واحدة واحدة، وبعده محرك بحث ياهوو إنتهى (طبعا جوجل قضت عليه)، متبقاش غير البريد الالكتروني اللي سقط هو كمان خاصة في الفترة الأخيرة بعد كم الهاك والتسريبات الأمنية اللي حصلت فيه …
وبكده ياهوو مبقاش عندها حاجة تنافس بيها وده اللي أدى لسقوطها من على العرش لأنها ببساطة مهتمتش بتطوير الخدمات دي ولا واكبت التطور.
أسباب فشل ياهوو لازم تتبروز كده وتتحط قصاد أي شركة لأن البدايات دايما سهلة الأصعب إنك تحافظ على نجاحك .
