الأم مدرسة

عايزة طفلك اللي بيعيط جدا يهدى و يسكت.. شيليه و شاوريله لفوق علي حاجة ممكن يلمسها..هيسكت و يبطل عياط، أو علي أقل تقدير عياطه هيهدى كتير.عايزة ابنك/ بنتك يناموا بسهولة.. اديهم كراسة تلوين متكنش قصاد عينهم بشكل دائم، و تكون مناطق التلوين فيها محدودة و صغيرة..بعد وقت قليل من بداية تلوينهم هتلاقيهم ناموا بسهولة.#عايزة طفلك يحكيلك عن يومه.. ابدأي بنفسك..و احكيله عن يومك.عايزة ولادك يبطلوا يرموا أي حاجة من علي الأرض.. صممي إنهم هم اللي يجبوها بنفسهم و الكلام ده من عمر سنتين ..يتعود يجيب اللي رماه بنفسه. و بلاش موضوع هجمع الحاجة أنا علشان أخلص..و ترجعي تشتكي إن ولادك مخليين البيت فوضى!! انت اللي سمحتي من الأول إنهم يفرضوا سياسة الفوضى في البيت.عايزة طفلك يقدر يعبر عن نفسه.. زودي الحوار الاجتماعي، و اسأليه عن إحساسه في المواقف المختلفة .عايزة طفلك يكبر علي احترام الخصوصية.. احترمي انت خصوصيته في الأول، و خليه يكون واثق إنك مش هتتطفلي علي اللي هو مش عايزك تعرفيه.عايزة طفلك يبقي حنين عليكي العمر كله.. احضنيه، احضنيه كتير.عايزة ولادك علاقتهم تبقي قوية .. علمي الصغير يحترم الكبير، و اطلبي من الكبير يحتوي الصغير، و انت شخصيا احتوي الكبير علشان يكون عنده طاقة لاحتواء أخوه الصغير . عايزة يكون عندك طاقة لتنفيذ كل اللي فات !! خصصي لنفسك وقت ليك انت.. انت و بس، بعيدا عن كل مهامك المنزلية و مسئولياتك الأسرية. عايزة يكون عندك الطاقة الكافية لإدارة بيت ناجح !! إوعي تصدقي إن مطلوب منك تتحولي لطباخة و لا موظفة و لا مربية.. انت أم، يعني أعظم مكانة في الدنيا.. يعني كل مهامك تنفذيها و انت راضية و سعيدة و قادرة تخلقي لروحك ضحكة و راحة وسط تحديات حياتك. متربطيش سعادتك أو ضحكتك بحد، هتستني كتير .