احتياطى مواجهة المستهدفات الأمنية ؟؟
== = = = = = = = = = = = =
حضرتك فاهم حاجة من الجملة اللى فوق دى .. لها اى تفسير عربى او هندى او هيروغليفى !!
شوف القصة
اليوم اثناء حضورنا ولفيف من السادة المحامين بتوع الارهاب بمعهد امناء الشرطة بطرة لحضور جلسة تجديد حبس الجنايات .. عند دخولنا للقاعة قوجئنا بأن القاعة كاملة من الفلول على رأسهم الاخ فريد الديب سخسيا .. لدرجة اننا تصورنا اننا دخلنا محكمة غلط .. مش وش ارهاب .
بعد ذلك تبين لنا ان هناك قضية منظورة لوزير الداخلية الاسبق ” حبيب العادلى بتاعكو ”
جلسنا نستمع لمرافعة النيابة حيث اننا لم نكن سمعنا عن هذه القضية من قبل .. حاولنا معرفة الموضوع من خلال مرافعة النيابة .. وكان ذلك بصعوبة حيث ان السيد ممثل النيابة كان يترافع بلغة غير مفهومة لنا اشبه بالعربى المكسر .
علمنا من خلال المرافعة ان القضية اسمها ” قضية الاستيلاء على اموال وزارة الداخلية ” متهم فيها حبيب العادلى بتاعكو ومدير حسابات وزارة الداخلية وبعض الموظفين .
المبلغ المسروق من ميزانية وزارة الداخلية ( 2 مليار و 388 مليون جنية ) ايووون زى ما سمعت 2 مليار .. مليااااار .. سيبك من ال388 مليون دول الفكة !!
قالت النيابة فى مرافعتها ان حبيب العادلى بتاعكو ومدير حساباته وضعوا على ميزانية وزارة الداخلية لعام 2009 و 2010 بند تحت اسم
” احتياطى مواجهة المستهدفات الأمنية ” بقيمة مليار و650 مليون جنية
تبين للنيابة ولجنة الفحص المالى ان البند ليس له معنى فلا يوجد شىء اسمه احتياطى مواجهة المستهدفات الأمنية .. وعجزعلماء علم الاحصاء والاقتصاد والمحاسبة عن معرفة معنى هذه الكلمة .
من خلال بند احتياطى مواجهة المستهدفات الأمنية لطش حبيب العادلى بتاعكو ومدير حساباته فى عام 2009 فقط مليار و650 مليون جنية ؟؟
انت متخيل يا مان اللى اتسرق مليار و 650 مليون فى ميزانية سنة واحدة ؟؟
امال ميزانية وزارة الداخلية كام لما اللى اتسرق منها مليار و650 مليون فى سنة ؟؟
قالت النيابة ايضا ان موظف من حسابات الوزارة شهد انه كان يوميا يتوجه مرتين لمكتب مدير الحسابات لتسليمة ظرف كبير ملىء بالاموال دون ان يوقع له على اى شىء يفيد الاستلام . مرتين كل يوم .. مش مرة واحدة مرتين وكل يوم .. يوميا !!
شهد الموظف ايضا انه تم سداد فواتير تليفونات منزلية ومحمول شخصية بلغت مليون و300 الف جنية فى سنة واحدة للوزير ومدير حساباته .
قال احد المتهمين ردا على الاتهام ان احتياطى مواجهة المستهدفات الامنية يعنى مصروفات ورواتب المصادر الامنية السرية ؟؟؟؟؟؟؟؟؟؟؟؟؟؟؟؟
احيييه … احييييييه .. المرشدين مرتبهم 2 مليار
( طب كنت قولى قبل ما ادخل كلية الحقوق )
قالت النيابة ان اجمالى ما لطشه حبيب العادلى بتاعكو ومدير حساباته تحت بند احتياطى مواجهة المستهدفات الامنية بلغ فى النهاية 2 مليار و388 مليون جنية … احيييه !!
الاتهام فى القضية عن الفترة من يناير 2009 الى يناير 2011
ثورة يناير لها كرامات محدش يعرفها لغاية دلوقتى .. لولا ثورة يناير مكناش حانعرف ان فى حاجة اسمها ” احتياطى مواجهة المستهدفات الامنية ب 2 مليار” ..
امال ميزانيتهم كلها كام ؟؟
ويجى واحد ابن كلب بعد كده يقولك #صبح_على_مصر_بجنية
جن لما يلطش اهلك يا بعيد !!
الصورة المرفقة للسادة المحامين بتوع الارهاب وهم حاطين ايدهم على خدهم وبيسمعوا مرافعة النيابة وارقام المليار وال2 مليار ..
شايف يابنى القضايا اللى بتجيب فلوس مش تقولى ارهاب محتمل
#ام_حبيب_العادلى_بتاعكو
![](https://domiatwindow.net/wp-content/uploads/2017/01/131020091317143.jpg)