راس االبر

هنشتي في رأس البر .. شاهد بالصور .. السحر والجمال والمتعة في مثلث رأس البر

الجمال اللى فى الصور ده جمال طبيعي وراحة نفسية غير عادية فى قطعة صغيره أوى فى بلدنا مثلث الجمال أسمها رأس البر الناس بتعشقها والمصيفيين بيجولها من اخر الدنيا في الصيف بس أحنا وناس كتير زينا مزاجهم ومتعتهم راس البر وليالي رأس البر فى الشتا فعلا كل حاجة فيها بتبقى جميلة ونضيفة ورايقة والبلد شغالة وبتستقبل المشتيين عادى جدا..

راس البر في الشتا هدوء و استجمام وراحة اعصاب وممكن تتمتع فيها بحاجات كتير 
ممكن تروح شارع النيل منطقة اللسان ( التقاء البحر بالنهر ) وتشوف الاعجاز الرباني في عدم اختلاطك مياة البحر بمياة النيل وده موج وده هادي . وتتمتع بمنظر الشروق والغروب ومنظر مراكب الصيد وهي سارحة وراجعة من السروح , ولو بتحب الصيد يا محلاة رحلة صيد في النيل او البحر .

ولو معاك حبايبك وشلتك ممكن تتمتعوا بالالعاب الشاطئية على المالح ولو حبيتوا تاكلوا فطار او غذاء ممكن اي سوق بمجمع الخدمات بالشوارع الرئيسية هتلاقي طلبك من الجبن بانواعها والفول والطعمية للفراخ المشوية والاسماك وشوربة البحر والجمبري والاخطابوط والكباب .بالمطاعم المتشرة اللي بتلبي رغبات جميع الاذواق .

لو انت بتحب تجيب وتختاراكلك بنفسك ورخيص في نفس الوقت هتحتاج اثناء الجولة النهرية هتعدي بالمعدية للناحية التانية ومنها تستمتع برحلة نيلية متكلفكش أكتر من 5 جنية عند عزبة البرج وتاخد اي عربية سرفيس للسوق هتلاقي ما لذ وطاب جميع انواع الاسماك والافران هتلاقيها في السوق وجميع الفواكة والعيش البلدي القابب والطري . والمخللات والخضرة والبصل الاخضر والكرات .

جبت الاكل اللي بتحبه تروح احلى شاطئ تتمتع باكلك انت واصحابك هتلاقي كل شارع على المالح له كازينوا مسئول عن تاجير الشماسي والكراسي المداد ومش هتلاقيها بفلوس حاجة بسيطة انت في الشتا خليك ناصح يعني طول اليوم شمسية واربع كراسي وترابيزة مش هتعدي 50 جنيه طول اليوم .طبعا في الصيف من 100 ل 150 لان موسم وزحمة جدا .

ولو حبيت تروح شاطئ الجربي على النيل هتلاقي بطول النهر في كازينوهات ونوادي وقعدات رائعة وفي مطاعم تجهزلك اللي انت عايزه مما لذ وطاب وممكن تجيب اكلك معاك زي ما تفقنا ويحسبلك الخدمات والمشاريب . وهتلاقي في الجربي العاب نهرية زي البدال والفلوكة وصيد الشبار وفي المراجيح للاطفال وركوب العجل والعاب البلاي استيشن . وبعض النوادي فيها حمامات سباحة وجلسات رائعة ممتعة ومتنساش الصور التذكارية لكل الحركات والتركات على رأي الشيف حسن .

اتغديت وتمام وشربت شاي العصاري واتمتعت بغروب الشمس ممكن تستمر وتكمل يومك بالسهرة وتتفرج على ماتشات او افلام على شاشات العرض بالنوادي او شاطئ المالح وتكون عامل حسابك في تشكيلة اللب بانواعه والفول السوداني والشكلتات والمكسرات لو حبيت وهتلاقيها سخنة طازة من اي محمصة في دمياط ولو نسيت هتلاقي اللي بيمر عليك ويبعها لك , كل المشروبات الشتوية هتلاقيها متاحة ومتوفرة .

عايز ترجع تاني شارع النيل ليلا هتلاقي متعة تانية مع معظم المحلات والكافيهات اللي شغاله وتتمشى وتتفرج وتتمتع لغاية لما توصل للفنار واللسان وتقعد تاكلك كوز درة ولا حتة بطاطا ولا شوية فشار وغزل بنات ( ونصيحتي لازم تتقل الهدوم شويتين او تلبس كوفية لان الجو بليل برد برد برد ) .

تعبت من المشي هتدخل على اشهر مطاعم البيتزا والفطير المشلتت الدمياطي وسحلب المكسرات والحلبة المحوجة بالمكسرات والشوكولاتة الساخنة والبليلة بالمكسرات اظن كدا الجو سخن معاك والبرد اختفى من كيانك , متنساش حبايبك بقى قبل ما تغادر المشتى بالهدايا من معارض الحلويات الشرقية الرائعة الهريسة والبسبوسة والبغاشة والمكرونة والكنافة باللبن والسمن البلدي لست الحبايب ومتنساش المشبك الدمياطي طبعا احلى هدية لحبايبك .

عايز حوادق ادخل على الاجبان بانواعها الرومي المزيتة والجبنة البيضاء القديمة بقرن الفلافلة المشطشط احلى هدايا

اخر حاجة عايز اقولها لك ان ميزة ايجار الشقق او العشش زي ما الدمياطي بيقول عليها فى الشتا بتبدأ من 150 جنية ونضيفة لكن فى الصيف بتبقى هي نفسها 4 اضعاف سعر الايجار .

أنتم فعلا هتنبهروا بالبلد ونضافتها وشكلها واسعارها الشعبية
جربوا تروحوا فى الشتا وفعلا الأستجمام هيخليك واحد تانى ولو قعدت 4 أيام ممكن متكملش 1500 جنية انت واسرتك

نافذة دمياط تشكر الفتوجرافر الرائعين اللي زادوا الصورة لمسة جمال بفنهم وكل واحد موقع على الصورة اللي التقطها .. الف الف شكر وبالتوفيق دائما

عن نافذه دمياط

اترك تعليقاً