في ظل ارتفاع درجة الحرارة في صيف 2017 مع ارتفاع درجة حرارة الأسعار و انخفاض متوسط دخل الفرد و رفع الدعم عن محدودي الدخل و ارتفاع أسعار المياه و الكهرباء والمواصلات و الانترنت , هل أصبحت رأس البر مصيف طارد للسياحة الشعبية والمتوسطة ؟ بعد ان كانت هي المتنفس المتاح لشريحة كبيرة من محدودي الدخل فلجأ كثير من الناس الي رحلة اليوم الواحد بعد أن كان يؤجر عدة أيام و من كان يحجز بالشهر أصبح يؤجر بالأسبوع مع انحدار جودة الخدمات بالرغم من ارتفاع الأسعار المبالغ فيه فلم تسلم مدينة رأس البر من ارتفاع أسعار الشقق و ارتفاع ايجار الشواطئ . مع انتشار السماسرة الاغراب الذين لاهم لهم الا المكسب دون النظر الى الخدمة المقدمة و جودتها و كفاءة العشة .

ف قد اشتكي العديد من المصطافين من زيادة الأسعار وسوء الخدمة والمرافق وانتشار الحشرات والفئران و غرق بعض شوارع رأس البر بالصرف الصحي مع غياب المجلس  ..

فقال مواطن : بنسال على حجز شقة لقينا أرقام خيالية واقل حاجة 500ج اليوم وفي مناطق سيئة ليه مش عارف مع انها بقت رديئة جدا وزحمة مووت . مرسى مطروح انظف وارخص واهدء .

ده شارع ٨٩ ع١٤ يعنى أمام عشش المعلمين المنظر ده بقا ليا اسابيع كل يوم تزيد والعشه اللى بتخرج منها المجارى دى قديمه وحتى ليها ازاله وللاسف فيها سكان وأصحاب العشه الاساسيه منهم واحد كان ماسك منصب ف المجلس ياريت توصل إلى مسئول بصراحه الريحه زفت ومش قادرين نعد زى البشر ف البلكونه حتى

في زيارة للشاطئ إيجار الشمسية من 80 الي 100 جنيه و انتشار القمامة علي الشاطئ و الباعة الجائلين و قناديل البحر .

و قال أخر : انا كنت فيها يوم الخميس . كل حاجه فيها معفنه . والميه ميه ترعه اقسم بالله . ولا تعامل اصحاب الكافتيريات و الحمامات هناك . منتهي قله الادب والبلطجه . الحمام الصبح ب 2 جنيه العصر ب 5 جنيه.

مما يأتي منافيا لما ادعته قناة cbc  في تقرير لها تقول ان رأس البر لم تطلها يد الغلاء..

 

وبالنسبة الي مشكلة الباعة الجائلين فقال مواطن :
الباعه الجائلين موجودين فى كل شبر وكل مكان ممكن تتخيله مع استحالة المشى على شارع النيل من كم المخالفات الموجوده عليه و الازعاج المتواصل من باعة الانابيب وغزل البنات,ياريت السادة المسؤولين يهتموا براس البر ويبطلوا تنبله ويشتغلوا شويه.

 

كما انتشرت ظاهرة السرقة استغلالا للزحام الشديد ,فيحكي مواطن عن واقعة سرقة جدثت امامه : واحد ماشي مع زوجته على النيل في راس البر وقام حرامي نتش الشنطة من يد زوجته الراجل جري وراء الحرامي ومسكه ومجرد ما مسكه جميع الباعة المتجولين نزلوا ضرب في الراجل اللي زوجته اتسرقت علشان الحرامي زميلهم وحسبي الله ونعم الوكيل .

 

كما أوضح من جانبه أحد ملاك العشش ان ارتفاع الأسعار ليس ناتجا من جشع الملاك و لكن من ارتفاع الرسوم المفروضة عليهم :يا جماعة تحبوا تسمعوا ليه الأسعار زادت اقولك كيلو الكهرباء بيتحاسب سياحي يعني حضرتك 5 غرف يستهلكون كل 3 أيام 400 كهرباء طيب الحكومة بتحاسبني متر المياه ب 3.5 جنيه في حين انك في بيتك ب .48 قرش
طيب الضرائب بتاخد 21% من الدخل
رسوم وضريبة ملاهي ورخص9% من الدخل مرتبات عمال ويوميات بتمثل 10% من الدخل مصاريف صيانة دورية سنوية بتمثل35% من الدخل مصاريف نثرية15% بيقي حوالي10% الي 20% حسب كل قطاع مكسب ليه سنويا الصرف الصحي بتم حسابي 10% من قيمة فاتورة المياه.

نترك لكم النعليق من امام مجلس مدينة راس البر !!؛

 

 

فيديو لقناة cbc تناقض نفسها و تقوم بحوارات مع المصطافين برأس البر يوضحوا غلاء الأسعار و ردائة الخدمات .