نافذة دمياط نافذتك على أخبار وجديد محافظة دمياط
1_ ما تحميش ابنك عمال علي بطال خلي الحموم لوقته
2_ الحموم يكون بالليل وينام ميخرجش بعدها
3_ ابنك اللي بيروح الحضانة او المدرسة لازم تلبسيه بكم ولو قطعة وحده وزودي بعد كده براحتك او حسب الجو عندك
4_ شرب الماء قبل الخروج من البيت شئ أساسي الصبح أو بالليل
5_ السوايل الدافيه ثم السوايل الدافيه ثم السوايل الدافيه
6_ الطفل وهو نايم بالليل يلبس لبس كامل وتقيل لانه مش بيتغطي ولو اتغطي بيكشف الغطي
7_ غسيل الوجه واليدين بميه من الحنفيه يوميا قبل الخروج من البيت الصبح او بالليل
8_تهوية المنزل يوميا في الوقت من 10 صباحا الي 1 ظهرا
علشان نجدد هوا البيت ننقي الجو ندخل هوا نضيف
9_ أسواء اختراع اخترعوه هو الدفايه حاجه استغفر الله العظيم
10_ لو في حد في البيت بيدخن ياريت يدخن بره البيت وأول مايدخل يغير هدومه وياخد دش لان الدخان ليه أثر سلبي علي كل الاطفال
11_ ما تحميش ابنك وحياه أغلي حاجة عندك كفاية مرة في الاسبوع
12_ الموز والتفاح بيقوو المناعه كترو منهم للاطفال في الشتاء
13_ الكمثري والبلح كلهم فيتامين سي وحديد
14_ معلقة عسل نحل علي معلقة زيت زيتون علي علبة زبادي يوميا تقوي المناعه وتفتح النفس علي الاكل
15_ لو انتشرت عدوي في الجو قعدي ابنك من المدرسة مش تستني لما يتعدي
16_ لو ابنك تعب اتقي ربنا في ولاد الناس وقعديه من المدرسة علشان ما يعديش حد
17_ لو الجو برد شديد قوي وفيه مطرة ابنك مش في الثانوية يعني قعديه من المدرسه عادي خالص
18_ يلا نحضن بعض وندفي بعض ونفس في وش بعض علشان نعدي بعض ونحقق تكافل اجتماعي بلاش منها لمصلحتكو اولا
19_ ابنك عنده حساسيه او معندوش حساسيه بلاش يلبس صوف او يلعب بلعب الدباديب والحاجات اللي بتعبي تراب علشان متكتمش نفسه
20_ الموضه اليومين دول كل واحد مربي قطه بفرو الحلوة دي في البيت ونايمة معاهم واكلة وشاربة معاهم انا بقول نربي عيالنا احسن
21_ ابنك اللي اقل من5 سنين ميروحش الحضانة غير في الايام اللي الجو فيه كويس
22_ أكل طازه كل يوم وبلاش كسل ( شوربه الخضار _ شوربه العدس_ بعد الشر شوربه اللحمه ( الكيلو ب150 ج) مفيدة جدا في البرد
23_ بلاش تودي ابنك الحضانه اساسا اقعدي وعلميه في البيت ابنك بردو مش غريب (مزاح)
24_ لو بتلبسي ابنك قطعة واحدة او بتلبسيه 100 قطعه زي مايقلع يلبس يعني زي ما قلع 4 يلبس زيهم 4 مثلا يعني
25_ لما تحبي ترضعي ابنك مش تاخديه في جو برد وترضعيه لازم ترضعيه في مكان دافي ليه ؟
لان الطفل لو في مكان برد هيبقي زوره بارد واللبن بطبعه هينزل سخن يبقي سخن علي بارد نشاط للبكتريا والفيروسات
26_ لو بترضعي صناعي طبعا مش هوصيكي تغلي الببرونات كويس اوي
27_ العشاء لكل العيله يكون خفيف جبنه وعيش ومربي بلاش محشي في العشا ولما الواد يرجع نقول من ايه؟
28_ ادي ابنك فيتاميناته الضرورية فيتامين د كل يوم ولو فيه انيميا ادي حديد
29_ فيتامين سي وفيتامين ا جامدين في الشتا وبيزودو المناعة جدا وبالدراسة وبالخبره وملهومش اضرار وسيبكو من حوار فيتامين د والفيدروب ملوش لازمه للبرد
30_ معظم التهابات الشتاء فيروسيه مش بكتريا بلاش تجري وتدي مضاد حيوي عمال علي بطال
31_ رشح وعطس مضاد للحساسية وسوايل دافيه زي زيرتك وفنستيل وتلفاست وكلارتين واخواتهم
32_ حساسية انف بخاخه نازونكس او فلكسينوز او نازوكورت او افاميز ومضاد للحساسيه
33_ التهاب حلق متكرر ولوز برونكوفاكسيوم لمده 3 شهور اول 10 ايام من كل شهر
34_ حساسيه صدر :
بخاخه فلكسوتيد + جلسات + ادويه الحساسيه
ومتابعه مع دكتور بيفهم وشاطر
35_ ترجيع مستمر ادي دانست امبول وريح المعده ساعه بدون اكل او رضاعه جرعته سم لكل 13 كيلو كل 12 ساعه
36_ مش كل كحه حساسيه صدر وجلسات وتوهمي نفسك لازم تتأكدي انها حساسيه صدر الاول بلاش حد يشتغلك
37_ نزله شعبيه او التهاب رئوي لنتحجز في مستشفي ياعند دكتور ياما نجيب جهاز الجلسات في البيت
38_ متستخسرش في طفلك تحليل او اشعه تثبت بيها هو عنده ايه دا الصح
39_ من اسواء الامراض في الشتاء النزلة المعوية لانها بتكون فيروسيه جفاف مباشرة متكسليش تكشفي بسرعه علي النزله المعويه
40_ داوو مرضاكم بالصدقات اكثرو من الصدقات ربنا يحمي اولادنا واولادكم يارب
41_ حساسيه الصدر ابنك بيتنفس بصعوبه وبيصفر او صدره بيزيق تعملي جلسه او اتنين ابنك صدره يبقي تمام هي دي حساسيه الصدر
42_ مش كحه بقي وبلغم وسخونيه يبقي حساسيه صدر وبعدين حساسيه الصدر مبتجبش سخونيه اصلا
43_ تطعيم الانفلونزا الموسميه بيجيب نتيجه حلوة اوي بالذات مع اطفال الحساسيه بس مع شويه محافظه واحتياطات للبرد
44_ تطعيم الالتهاب الرئوي دا مفيد لكل اللي بيتكرر ليه التهاب رئوي في الشتا
45_غسيل الانف نص العلاج في النزله الشعبيه او الالتهاب الرئوي في الاطفال الرضع
46_ لما يبقي حد في العيلة عنده برد ياريت يستخ دم كمامة علي الانف والفم بلاش ينشر الفيرس للعيله كلها
47_ انتي عندك مشاء الله 3 اطفال بلاش تحميهم كلهم في يوم واحد علشان تعرفي تحمي كل واحد وتدفيه قبل ماياخد برد
48_ استخدام البخاخات طول الشتا والله مش هيضر بالعكس مفيد وبيعالج لازم نغير مفهومنا عن العلاج
49_ استخدام منديل قطن اثناء الخروج من البيت الصبح في البرد وقايه من البرد
منقول مع الشكر لناشره ومعديه
