فضائح مستشفيات الإنقلاب في حادث نويبع لطلبة صيدلة بالاسكندرية (خرجوهم بدون علاج)

#حادث_نويبع

انا طالبة في الدفعة اللي عملت الحادثة في نويبع من صيدلة اسكندرية ..
بعد الحادثة راح لهم رئيس الجامعة و كان عاوز يرجعهم بري و هما متكسرين و متدغدغين و منهم عنده شبهة ارتجاج في طريق 12 ساعة .. سافروا لهم ناس مننا و ضغطوا علشان يرجعوا طيران فرجعوا في طيارة عسكرية .. و بالواسطة و بالقرايب و بالمحايلة ما فرقوش بين الطالب و المرافق .. علشان كانوا عاوزين يخلوا الطلبة في مستشفي للطلبة و اخواتهم و قرايبهم المرافقين في مستشفي عام تانية ..
وصلوا امبارح مستشفي سموحة الجامعي في حضور قائد المنطقة الشمالية و المحافظ و كان فيه دكاترة و فيه كاميرات للقنوات الفضائية .. فكوا لهم الجبائر اللي جايين بيهم علي اساس انهم هيتجبسوا .. مشيوا المسئولين و معاهم الكاميرات فالدكاترة مشيوا هما كمان .. و مافضلش في المستشفي غير دكاترة الامتياز و العيال متكسرة و قعدوا لحد الصبح من غير جبس.. المستشفي مهجورة و مش مجهزة .. زميلنا اسمه معاذ حمدي رجله كانت مفتوحة و بتنزف ساعتين مافيش خيط يخيطوه و لا فيه ابر خياطة مضي تعهد و خرج علي مسؤليته الشخصية .. بنت تانية اسمها غادة اسماعيل عندها كسر في الوجه و كسر في العصعص كانت بتصرخ من الالم ساعتين متواصلين .. محدش اداها مسكن .. محدش دخل لها اصلا .. قعدوا زمايلنا يدوروا علي حد لاقوا دكتور امتياز قالوا له يجيب لها مورفين قالهم مافيش مورفين .. قالوا له دي هتموت من الوجع قالهم محدش بيموت من الوجع .. مسكوا فيه و كانوا هيضربوه جابوا لهم الامن .. البنت اهلها خرجوها برضه بتعهد و ودوها مستشفي خاصة و هي بتصرخ ..
كلموا العميدة بليل قالت لهم الصباح رباح .. فضلوا طول الليل بيصرخوا .. احنا محتاجين ضغط اعلامي بأي شكل .. محدش بيتحرك غير في وجود صحفيين و اعلام .. صحابنا بيموتوا .. ارجوك لو تعرف تتصرف ساعدنا.. احنا محتاجين ضغط اعلامي
#صيدلة_إسكندريه