نافذة دمياط نافذتك على أخبار وجديد محافظة دمياط
يادمايطة هو عيد لحمة اه بس لازم مننساش ندخل السرور علي قلوب أطفالنا باللي بيحبوه
و نعمل معاهم خروف العيد يفرحوا بيه و يبقي من أنشطة العيد
معانا كذا طريقة لعمل الخروف كل طفل يختار يحب يعمل إيه و إيه اللي خاماته متوفره عندنا في البيت
أول طريقة معانا ” ماسك خروف “
الخامات ( طبق بلاستيك أو فوم ، مقص ، قطن ، قماش جوخ و ممكن نستبدله بورق كرتون ، عصي آيس كريم أو عصي شيش طاووق ، أي مادة لاصقة متوفرة )
* نفرغ الطبق من النص علي قد وش الطفل
* نغطيه كله بالقطن
* نقص 2 قرن الخروف من الورق أو قماش الجوخ و نلزقهم من ظهر الماسك
* نحط العصاية في ظهر الماسك و كده أول طريقة معانا :v:
تاني طريقة ” خروف الفشار “
الخامات ( ذرة فشار ، أكياس ، ورق ، ألوان , مقص ، أي مادة لاصقة متوفرة )
* نسوي الفشار و ناخد بالنا لا الأطفال يكلوه كله قبل ما نعمل الخروف
* نقص وش الخروف من الورق و نلونه
* نملي الكيس فشار نربطه و نلزق الوش عليه
و بالهنا و الشفا لأطفالنا
تالت طريقة ” مجسم خروف “
الخامات ( مشابك ، أي لون أسود متوفر ” فلومستر ، ألوان مائية ، أكريليك ” ، قطن ، كوب من الورق ، ورق أسود و أبيض ، أي مادة لاصقة متوفرة )
* هنغطي الكوب بالقطن عن طريق أي لاصق
* هنلون ٤ مشابك باللون الأسود و نشبكهم في الكوب من فوق و نقلبه
* نقص وش الخروف بالورق الأبيض و الأسود و لو مش متاح أسود نلون الأبيض بلون أسود و نشتغل بيه و نلزقه بأي مادة لازقه
و يبقي عندنا خروف نحطه ديكور علي مكتب الأطفال و يلعبوا بيه 🤟
رابع طريقة ” خروف العصا “
الخامات ( ورق ملون ، أي مادة لاصقة ، عصي آيس كريم )
* نقص شكل كامل للخروف من أي ورق ملون متاح عندنا
* نجيب آيس كريم لأولادنا و ناخد العصا نغسلها كويس و نلزقها من ظهر شكل الخروف اللي عملناه بالورق
و كده يكونو أكلوا آيس كريم و عملوا خروف العيد
كل عام و أنتم و أولادكم بألف خير
