أخبار عاجلة

رسالة من معتقلي سجن العقرب

ولادكم الأسرى الرجاله المعتقلين في #سجن_العقرب في مبنى H1 عنبر2 (H1W2) بدأوا النهاردة وانتوا بتقرأوا الكلام ده اضراب عن الطعام، وده بسبب ان ادارة السجن منعه اي كشف طبي علي أي عيان فيهم، وممنوع يشتروا أكل من كانتين السجن، ومش بيجيبوا ليهم أكل السجن بانتظام ومتعمدين يجوعوهم، ومنعين عنهم زيارة أهاليهم خالص، ومنعين عنهم التريض والخروج من الزنزانة علشان يحركوا جسمهم وكمان جسمهم يشوف الشمس فميصابوش بأمراض زي الدرن أو الجرب، مش بس كده ده كمان قافلين النضارة الي بتبقي في الباب وبتبقي متنفس للي محبوس انه يشم هوا الطرقة الي بره الزنزانة، وكمان الشباب قاعدة محبوسة لوحدها ومانعينهم يعرفوا يتواصلوا مع بعض وده طبعاً تعذيب نفسي الغرض منه اصابتهم بأمراض نفسية، لدرجة أن الشباب بقت بتقول أمن الدولة كان أرحم.

الشباب منعنين عنهم الغيارات الداخلية، ومش بيخرجوهم يستحموا، ولما حد طلب صابونه بس اتعاقب بالضرب المبرح من مجرمين السجن من امناء وضباط، كمان الزنزانة الإضاءه فيها تصيب بالأمراض وتأثر سلباً على العيون لأنهم حاطين لمبه صفرا بره الشباك 200 وات بتخلي الزنزانة الضيقة حرارتها عاليه جداً والهواء بيبقي سخن جدا، دا غير ان الهواء في الزنزانة مش بيتغير، فريحة الزنزانة بتبقي كمان سيئة وفيها حشرات مختلفة.

أكثر من معتقل بعت أن (H1W2) هو اسوأ مكان حالياً في سجن العقرب وانه جحيم.
………….
المطلوب مننا دلوقتى بالترتيب:
1- أهالي المعتقلين الأسرى يعملوا بلاغ في النيابة وبلاغ عند النائب العام بالإنتهاكات إلى بتحصل في الوينج والعنبر ده تحديداً.

2- الصحفيين والإعلاميين، مطلوب تغطية إعلامية في كل القنوات (الجزيرة، العربي، مكملين، الشرق، القناة9، وغيرها)، وتغطية صحفية في مواقع (هاف بوست، نون بوست، ساسة بوست، عربي21، الجزيرة نت، العربي الجديد، مصر العربية، البديل، والي يقدر يوصل لصحف مصرية تانية يبقي كويس جداً).

3- الناس الي عايشه بره مصر، مطلوب تواصل مع الصحف والؤسسات الإعلامية العالمية، وتحت مطلب واحد ، فتح المجال لمنظمات حقق الإنسان المصرية لزيارة كل السجون وتوفير الدعم الصحي لكل السجناء سياسيين وجنائيين دون أي تفرقة.

4- الناس إلى على السوشيال ميديا (ولاد، وبنات، رجاله كبار، وستات كبار أو صغيرين، أطفال، كله)، مطلوب ندعم اخواتنا بالنشر المكثف والمطالبة بفتح الزيارة ي كل سجون مصر، وتوفيرالرعاية الصحية لكل مسجون في مصر، وان من حق كل مسجون أن أمه وابوه يشوفوه ويحضنوه ويطمنوا عليه، ومن حق كل زوجة وابن وبنت يطمنوا على باباهم، ومن حق كل معتقلة أنها تخرج لبيتها واسرتها.

ولقد وصانا رسول الله صلى الله عليه وسلم فقال لنا: كونوا عباد الله إخواناً المسلم أخو المسلم، لا يظلمه، ولا يخذله.

واخوانكم قد استعانوا بكم بعد الله.

فافعلوا لهم ماتحبونه لأنفسكم، فقد قال رسول الله صلى الله عليه وسلم: لا يؤمن أحدكم حتى يحب لأخيه ما يحب لنفسه.

فاستعينوا بالله وتوكلوا عليه، ولاتحقروا من المعروف شىء.

رسالة من معتقلي العقرب

عن نافذه دمياط

اترك تعليقاً