خمس خطوات تساعدك علي سهولة القراءة والحفظ..

كتير مننا لما بيجي يقرأ كتب أو يحفظ أثناء المذاكرة بيكون غير مستوعب أو بينسي بعدها بفترة بسيطة ، طب ايه الحل ؟ في طريقة أسمها SQ3r كتبت في كتاب صدر سنه 1946، وتتمثل خطوات الطريقة في خمس خطوات وهي :
الفحص Survey
المقصود بالفحص أنك لما تقرأ كتاب جديد مثلا مبدأش القراءة من الجلدة للجلدة، لكن اخد من 5 – 10 دقائق أني اشوف الكتاب ده بيتكلم عن إيه، اقرأ الأول الفهرس بتاعه وبعد كده العناوين الرئيسية والفرعية، لو فيه كلام مكتوب داخل براويز مثلاً أو بخط تقيل اخد بالي منه، اشوف الرسومات اللي موجودة والوصف بتاعها وهكذا، الهدف من الخطوة دي أني اخد فكرة عامة عن الكتاب وعن المواضيع اللي فيه.
الأسئلة Question
بعد ما اخلص أول خطوة ممكن اجيب ورقة فاضية واقسمها نصين، في النص اللي على الشمال بحول عناوين الكتاب اللي قرأتها في الخطوة الأولى لأسئلة، مثلاً ممكن يكون فيه عنوان “مشاكل القراءة”، وقتها بكتب سؤال “إيه هي مشاكل القراءة وإزاي اتغلب عليها؟”، وهكذا لباقي العناوين، بكتب برضه أي أسئلة عندي عايز أوصل لإجاباتها من قراءة الكتاب، بحاول افتكر لو عندي أي معلومات قديمة خاصة بالأسئلة دي.
القراءة Read
بعد كده ابدأ في القراءة الفعلية للكتاب…القراءة هنا بتكون باستخدام تقنيات القراءة السريعة، الهدف من قرائتي أني اةصل لإجابات عن الأسئلة اللي حددتها في الخطوة اللي قبل دي، بكده مخي هيبقى مركز إزاي يطلع بأقصى استفادة ممكنة من القراءة، ممكن في الخطوة دي اكتب إجابات الأسئلة في النص التاني من الورقة اللي أنا جهزتها في الخطوة اللي فاتت.
الشرح Recite
في الخطوة دي بحاول اصيغ اللي فهمته من الكتاب بأسلوبي…ممكن اكتب اللي أنا فهمته في ورقة أو الأفضل اني ادور على حد مهتم بنفس المواضيع واشرحله اللي فهمته…لو مش لاقي حد ممكن اتخيل اني باشرح الكلام ده لواحد صاحبي ..لو لقيت فيه جزء معين مش قادر ابسطه أو اشرحه ممكن اعيد قراءة الجزء ده تاني بشكل سريع، الهدف من الخطوة دي هو أني اثبت المعلومات الجديدة في مخي بشكل أحسن.
المراجعة Review
في الخطوة الأخيرة براجع الورقة أو الملاحظات اللي كتبتها في الخطوات اللي قبل كده، المراجعة دي الأفضل تبقى بعد نهاية القراءة بيوم على الأقل…ممكن اراجع مرة تانية بعد أسبوع ثم بعد شهر…ده هيساعد بشكل كبير أن المعلومات تبقى موجودة على طول في دماغك وتقدر تستفيد بيها في وقت الحاجة.