أخبار عاجلة

حكاية .. طالب إعدادي المتطرف

و احنا فى تالته اعدادى و من حوالى بتاع عشرين سنه كده … دخل علينا الفصل مدرس اللغه العربيه ذات مره و هو هايج جدا زى التور الاهوج و مع انها كانت اول حصه ليه عندنا الا انه كان هايج و عصبى مش عارفين ليه … و بسرعه راح الباشا حط الشنطه بتاعته على الترابيزه و طلع منها جلده سوده ضخمه و راح بسرعه متوجه ناحية اول طالب فى الصف الاول و راح قاله سمّع يابنى النص اللى اخدتوه … الواد بص كده و استغرب و فتح بقه … و قال له اسمّع !!! اسمّع ايه يا استاذ !!! و نص ايه،، ده حضرتك اول مره تدخل لنا فيها النهارده يسلم مقام حضرتك … و لسه ماديتناش اى حاجه عشان نحفظها او نسمعها … الاستاذ قال له يعنى مش حافظ طب افتح ايدك كده … بعد جدال و شد و جذب لم يستغرق اكثر من خمس دقايق كان سامح اللى هو اول واحد فى اول صف بيفتح ايده و بيتضرب وسط ذهول من الفصل كله مع بعض الاستنكار و الهمهمه …
بعدها راح الاستاذ توجه للطالب اللى بعده و كان اسمه محمد عادل و راح قال له سمع انت بقى يا بنى النص … محمد عادل استغرب برضو و قال نفس الكلمتين … ان دى اول حصه لحضرتك و انت لسه مادتناش حاجه بس المناقشه المره دى اخدت تلات دقايق بس و بعدها فتح ايده و اتضرب برضو بس الهمهمه كانت اقل شويه … و بعدها طلع على الطالب التالت … و ده ماقالش الجمله غير مره واحده و بعدين اتضرب من سكات و فى سكوت من الفصل ،، و من بعد الطالب التالت بقى كل طالب بيقوم يفتح ايديه و يتضرب من سكات و يقعد تانى و هكذا الفصل كله اتضرب بلا استثناء … بما فيهم انا … اتضربت و سكت و خلاص … اتضربت ليه مش عارف … بس لقيت الكل بيتضرب و من سكات كمان … قلت فى نفسى يعنى هى جت عليك … لما اشقى و اصيع طلبه فى الفصل اتضربوا و من سكات ومحدش فيهم فتح بقه ،، هاتعترض انت يعنى …..
ماعدا واحد بس ….
واحد بس مارضيش يتضرب …و أصرّ على موقفه …
الواحد ده ماكانش طالب شقى و لا لمض و لا صايع و لا فاقد و لا مستبيع خالص … بالعكس الطالب ده كان الاول على الفصل بل و المدرسه بأكملها … كان اسمه محمد فتحى …
محمد ده كان عامل زى ابو تريكه فى اخلاقه و ضحكته و بساطته و هدوءه و ادبه دلوقت … كان محبوب فى المدرسه كلها … كان دايما يطلع الاول على المدرسه كل سنه… دايما مؤدب ،، دايما فى حاله ،، عينيه فى الارض و هو ماشى ،، هادى جدا ماحدش يسمع له صوت ،، متربى جدا و ابن ناس ،، عمره ما احتك او اتخانق باى طالب و المدرسه كلها بما فيهم المدرس ده كانوا عارفين محمد فتحى كويس جدا لأنه كان علامه مميزه فى المدرسه كلها ….
بصراحه احنا كلنا استغربنا جدا و مكناش نتوقع ان محمد المؤدب الهادى هو الوحيد اللى يرفض انه يتضرب و يصّر على كده كمان …
الاستاذ شاف ان كرامته هاتتهزأ اكتر لو فضل يجادل قصاد محمد اكتر من كده ،،، فراح مطلع محمد بره الدرج و وقفه ورا الفصل … و راح مكمل ضرب فى الفصل و للاسف الناس كملت و قعدت تتضرب و من سكات برضو … و للاسف و بنفس الوتيره كله بقى من سكات بيمد ايده و ياخد العصايتين و يسكت … لحد ما خلص الفصل كله … و رجع لمحمد تانى استفرد بيه … و نزل فيه ضرب بصوره كانت وحشيه و مستفزه جدا بس محمد برضو مرضيش يفتح ايده و اخد الضرب كله على جسمه … و احنا كلنا واقفين و بنتفرج .. متضايقين ،، مخنوقين ،، كنا مقسومين فى الرأى مجموعات …
ناس شايفه ان محمد محبكها زياده عن اللزوم و انه مفهاش حاجه لما ياخد له عصايتين تلاته و يسكت … ناس تانيه صعبان عليها محمد و نفسها يرحم نفسه و ياخد العصايتين دول ،، و ناس اخيره كان نفسها تعمل زى اللى عمله محمد بس للاسف معندهاش لا القدره و لا الشجاعه انها تعمل زييه …
محمد و اللى زييه كان عنده مبدأ … و المبدأ ده نتيجة حاجه اهله زرعوها فيه من صغره … انه يكون عنده كرامه و انه يقاتل من اجل كرامته لاخر نفس … و انه حتى لو مات او اتبهدل فى سبيل كرامته معندوش مانع … بس المهم انه مايتضربش ظلم و ان حقه مايتهضمش … او انه يحنى راسه ..
الاغرب و الادهى من كده … ان احنا اكتشفنا بعد كده ان الاستاذ ده كان عارف و متأكد ان دى اول حصه ليه و انه فعلا ماخدناش اى حاجه منه قبل كده عشان نسمّعها … و انه كان بيعمل فينا كده بس عشان خاطر نخاف منه و نعمل له حساب فى الايام الجايه و فى الحصص اللى بعد كده و انه اول ما يدخل الفصل الناس كلها تسكت فى حصته و تحترمه بمبدأ يدبح لنا القطه فى اول حصه … طبعا مفهوم قاصر و خاطىء و متنيل بستين نيله …. عليه و على اللى خلوه مدرس اصلا
السنه خلصت و محمد طلع الاول على المدرسه و كمل بأدبه و نجاحه و تفوقه و دخل كلية الهندسه و اصبح مهندس ناجح و متفوق كمان …
أهو مصر بلدنا دى عامله زى الفصل بتاعنا بالظبط … انضف ناس فيها و اللى عندهم كرامه و اللى رفضوا الذل و الظلم هم اللى متبهدلين دلوقت و بيتضربوا و بيعتقلوا و بيسافروا و بيهاجروا و بيتغربوا …. فى الوقت اللى الشعب منقسم ما بين ناس متعاطفه مع الناس دى بس مش قادره تعمل حاجه و ما بين ناس تانى شايفه ان الشباب اللى بيطالبوا بحقهم مكبرين الموضوع بزياده و مفهاش حاجه لما يعيشوا زييهم زى بقية الناس تحت البياده عادى ….
محمد كان دايما يقولى … انت عارف انا قعدت طول الحصه اتضرب على جسمى و مارضيتش افتح ايدى و كنت مستنى واحد او اتنين تانى منكم بس يقفوا معايا و يرفضوا الظلم و يقولوا لأ … واحد تانى معايا كان هايقلب الفصل كله عليه بعد كده .. لكن للاسف محدش فيكم فتح بقه ….
فعلا للاسف يا محمد كنت انضف واحد فينا … و للاسف كلنا كنا جبنا و كلنا بعناك و سبناك تضرب وحدك
احنا اسفين يا محمد … كنت عاوز تزرع فينا الكرامه فى مدارس حكوميه عامله زى الدوله اللى احنا عايشين فيها .. اتربينا فيها على ان احنا نتضرب و نسكت .. نتضرب من غير حتى مانعرف بنتضرب ليه ….
انت كنت الرجل الصح فى الفصل الغلط يا محمد …
احنا اسفين يا شباب ثورة مصر … انتو كنتو الصح و احنا اللى كنا غلط … احنا اللى اتعودنا ان احنا نتضرب من سكات … احنا اللى بالنسبه لنا اى حد يعترض على الظلم يبقى مش عارف مصلحة نفسه و بيودى نفسه فى داهيه

عن نافذه دمياط

اترك تعليقاً