أخبار عاجلة

ثمن زيارة هولاند : 90 مليار جنيه

خبر جديد “لنج” من مجلة La Tribune الفرنسية بتاريخ 15 أبريل…

مش احنا مفلسين والجنيه منهار والعملة “الصعبة” بقت “مستحيلة” بسبب الاسراف في مشتريات السلاح؟

برده حنشتري سلاح كمان!

الغرض الأساسي من زيارة هولاند لمصر هو توقيع أضخم صفقة عسكرية مع زبون أجنبي في تاريخ فرنسا الحديث بقيمة 8.85 مليار يورو (يعني تقريبا 90 مليار جنيه مصري … حاجة كده ببلاش!)

وستشمل:

– 2 قمر صناعي عسكري: 1 اتصالات + 1 استطلاع (تقريبا 0.6 مليار يورو)

– 2 فرقاطة جاويند 2500 + 1 كورفيت جاويند 1000 + 1 سفينة دورية ساحلية جاويند OPV (تقريبا 0.85 مليار يورو).

– 1 فرقاطة FREMM (تقريبا 1 مليار يورو)

– 2 سفينة Mistral اضافة للـ 2 الذي تم شرائهم (تقريبا 0.4 مليار يورو بدون تسليح).

– 12 مقاتلة Rafale (تقريبا 2.5 مليار يورو)

– 4 طائرات VIP من طراز Falcon-7X (تقريبا 0.3 مليار يورو) (طائرات الرئاسة)

– 24 مروحية عسكرية بحرية NH-90 (تقريبا 1.2 مليار يورو).

– 10 طائرات نقل عسكري A-400M (تقريبا 2 مليار يورو).

إوعى تسأل نفسك ليه مصر بتجدد أسطول طيارات الرئاسة (الـ 4 طائرات الـ Falcon-7X الي عايز السيسي يشتريهم) وهل ده أولوية (لكن الغاء الدعم للفقراء طبعا أولوية!)

وهل الطائرات الرئاسية الحالية من طراز Gulfstream “وحشة” مثلا!؟

و أيه النهم الي ظهر فجأة للسفن الميسترال ده!؟

محدش قادر يفهم احنا محتاجين 2 في ايه وليه هما أولوية دلوقتي …نقوم نشتري 2 كمان!؟

و دول طبعا لازم تشتريلهم مروحيات (لأنهم بيشيلوا مروحيات) فتوقعوا صفقة مروحيات جديدة وصفقة المروحيات الـ NH-90 هي أيضا مرتبطة بشراء السفن ده وغيرها من الفرقاطات الفرنسية …

كل ده بيمول من “قروض” تعطيها مؤسسات فرنسية لمصر وليس من الخليج كما يظن البعض …

يعني الشعب المصري هو الي بيدفع ثمن المغامرات ده من دمه وعرقه وقوته وحيدفع فوق الـ 8.85 مليار يورو (على الأقل) فوائد لأنها قرض (وطبعا ما نعرفش الفوائد كام … يلا بجملة! … النظام اتفاوض على التنازل عن جزيرتين من غير ما يقول للشعب … جات على ده يعني!) …

وكل ده علشان أيه!؟

أرضنا وبنتنازل عنها وحقنا في النيل وضيعناه خلاص والارهابيين الي في ليبيا بتوع داعش ما بنجيش ناحيتهم وبتوع سيناء اكيد مش حنحاربهم بفرقاطات وسفن انزال ومروحيات بحرية!!!

يا سيدي دلع نفسك بكام طيارة VIP … ماشي …كلهم 300 مليون يورو …

لكن نصرف 8.55 مليار يورو على تسليح بيخدم أجندة الملك سلمان مش شعب مصر الغلبان ليه!؟ …

يبقى يخدوك عندهم جنب بن علي أحسن!

هولاند بيبيع كل مبادئ الجمهورية الفرنسية ببيع السلاح لشخص مثل السيسي لكن ركز كويس …

هولاند حيدخل 8.85 مليار يورو لبلده الي اقتصادها بيعاني من التراجع …

الفرنسيين حيبوسوا رجليه على الخدمة الجليلة ده! …

السيسي حيخرج 8.85 مليار يورو من بلده الي اقتصادها مش بيعاني … لأ … منهار!

المصريين “الشرفاء” برده حيبوسوا رجليه وربما جزمته على المصيبة الجليلة ده!

اشتري ياعم سيسي … بيع الأرض واشتري مراكب وطيارات!

Gooo Sissiiiii Gooooo!

منقول – اسامة حجي

رابط الخبر بالمجلة الفرنسية

عن نافذه دمياط

اترك تعليقاً