أخبار عاجلة

توصية للناس اللي هتدبح والناس اللي بتوزع لحوم وشغالة في العمل التطوعي

كل سنه وانتو طيبين

للناس اللي هتدبح والناس اللي بتوزع لحوم وشغالة في العمل التطوعي .،
عشان تتجنبوا مشكلة ان اللحوم ممكن تبوظ بسبب الحر او يحصل لها تعفن
…ركزوا معايا كده حبة صغنين .عشان احنا كل سنة بنعاني من التبرعات اللي ممكن تيجي وفيها لحمة بايظة …

اولا :: الذبيحة لم تتدبح لازم تأكدوا على الجزار يسيبها شوية تصفي دمها قبل التقطيع وبعد التقطيع .”خلوا بالكم عشان الجزار هيكون مستعجل .عشان وراه ذبيح تاني .”

ثانياً: محدش يغطي اللحمة ويكتمها لان الجو حار وده فرصة كبيرة لنمو البكتريا وحدوث عفن

ثالثا: محدش يعبي اللحوم في اكياس وهي سخنة ولسه متقطعه …” هتعفن …استنوا عليها الدنيا مش هتطير ….سيبوها تتهوى”

رابعا: جيبوا مفرش كبير وافرشوا عليه اللحمة بعد تقطيعها وشغلوا عليها المراوح .ولما تبرد ابقوا عبوها في أكياس .

خامساً: متحطوش اللحمة سخنة في التلاجات علطول استنوا عليها تتهوى الأول لانها .”هتخضر ولونها هيغير ”

سادساً: متعملوش زحمة جوة الفريرز باللحمة لان اللحمة اللي على جوانب الفريرز هتسقع واللي جوه هتفضل سخنة ..”لو مفيش مكان قلبوا اللحمة جوة الفريرز كل ساعتين كده وخلوا اللي جوه بره والعكس عشان الكل يبرد ”

سابعا : متعبوش اللحمة في اكياس سودة .

ثامنا واهم حاجه : متحطوش اللحمة في شنطة العربية وتقعدوا تلفوا بها هنا وهناك لانها هتضرب وريحتها هتغير (حطوها في العربية من جوه وشغلوا التكييف أو افتحوا الشبابيك واخركم نص ساعة الجو لوحده من غير لحمة بيطلع كتاكيت

تاسعا : قبل ما تطلعوا اللحمة وتوزعوها افتحوا الاكياس وشموا اللحمة واتأكدوا أن لونها وريحتها متغيرتش.

عاشرا :لو التلاجة عندك مفيش فيها مكان للحمة ومش لاحق تنزل توزع أو الوقت أتأخر…..ممكن تسلق اللحمة افضل وتوزعها مطبوخة بدل ما تبوظ منك وهي لسه نية.

كل سنة وانتم طيبين وربنا يتقبل منكم سعيكم .
لا تنسوا اضحيتك لمن يستحقها

عن نافذه دمياط

اترك تعليقاً