نافذة دمياط نافذتك على أخبار وجديد محافظة دمياط
هقولك شوية أسرار عن الفول المدمس يمكن ماتكونش سمعتها قبل كده 😉
عمرك سألت نفسك هى ليه فتحة قدرة الفول أو الدماسة ديقه اوى كده ؟
▪️طب ليه الفول اللى بنعمله فى البيت مهما كلفنا وحطينا خامات مابيطلعش ناعم ولونه فاتح زى بتاع عربيات الفول؟
▪️طب ايه سر ريحة الفول فى المطعم أو عربية الفول وليه بتبقى حلوة اوى وبتشدك من بعيد وانت ماشى فى حالك لا بيك ولا عليك فجأه تلاقى نفسك واقف بتضرب طبق الفول بشكل لا إرادى ؟
✴️ بص يا سيدى
قشرة الفول عدوها الاول فى السوى هو الهواء ، لأنها ببساطة لما بتتعرض للهوا وهى رطبة بتتأكسد ولونها بيتغير ويبقى غامق ، والاكسدة دى لو حبينا نبسطهالك بمثال هتبقى شبه عملية الصداء اللى بتحصل للمعادن والحديد ، بمجرد ما تيجى عليه مية ويتعرض للهواء يحصله عملية أكسدة وتظهر عليه طبقة بلون مختلف
عشان كده قدرة الفول فتحتها ديقة جدااا لأن الفتحة دى هى الشباك اللى هيدخل منه الهواء على الفول أثناء عملية التدميس ، فبنحاول نقلل بقدر الإمكان مساحتها عشان نقلل كمية الهواء اللى هيتعرضلها وهتدخل عليه جوه وهو بيستوى
🔻 يبقى لو حبينا نقول سر اللون الفاتح هنقول إنه ما يتعرضش للهواء خالص ودى تبقى بإننا نعمل الحاجات دي 👇
١- نستخدم الدماسة ومش اى حاجة تانية
٢- مانفتحش عليه كتير وهو بيستوى على النار
٣- بعد النقع مانسيبوش شوية برة يتصفى وبعدها ننزله فى الدماسة ده بيخللى القشرة تشرب هواء وطبعا بتسوود مننا فى السوى ، الصح يطلع من مية النقع وهو مبلول على طول على الدماسة.
٤- لو حابين نضمن النتيجة اكتر هنضيف عصرة ليمون معاه أثناء التدميس هتمنع الأكسدة
🔻 طيب ايه السر اللى يخليه ناعم وطرى؟؟
١- نوع الفول لازم يكون جيد ونختار الحبات المفرودة الفاتحة ونبعد عن الحبات الصغيرة اللى لونها غامق (يفضل الفول البلدي)
٢- مدة النقع ما تقلش عن ٢٤ ساعة لأن ده يعتبر نص السوى وكمان عشان نقلل من زمن التسوية على النار ومايقعدش بالساعات لأن ده بيخليه عرضه اكتر للشياط
٣- نار التسوية كل ماكانت هاديه وخفيفة كل ما كان أطرى وانعم
🔻 تمام .. ليه بقى ريحته بتبقى برة حلوة وفى البيت لاء وكمان قوام المية بتاعتة بتبقى كريمة كده ومزبدة ؟؟
خود السر ده وماتقولش لحد 😉
بيحطوا مع كل كيلو فول نص كوباية غلة (قمح البليلة) وده سر مش بيطلعوا بره لانه يعتبر من اسرار الصنعة بس مايغلاش عليكم 😉
وطبعا بينضاف كمية من الفول المدشوش عشان تدى قوام ناعم للمية وماتبقاش خفيفة … مش بيحطوا دقيق ولا عدس ده لو عاوزين نعمل الفول على أصوله 👌
لو عاوزين المية لونها يبقى احمر هنضيف لكل كيلو طمطماية واحدة مش اكتر لأنها بتقلل فترة صلاحيته ودى خطوة اختيارى
وبالهنا ❤️🙂💐
منقول
