حكاية الفراخ المستوردة من الاول

أحمد الوكيل رئيس الاتحاد العام للغرف التجارية هو المستورد لشحنة الفراخ المجمدة و اللي بسببها اجتمعت الحكومة مخصوص و اعفت الفراخ المجمدة من الضرائب الجمركية.

images

⏹ نبدا الحكاية من الأول
الفراخ تم الاتفاق على استيرادها قبل قرار تعويم الدولار يعني حصل أحمد الوكيل على الدولار من البنوك بسعر 8.88 جنية و اللي دبر المبلغ قيمة الشحنة هو البنوك المصرية برعاية طارق عامر محافظ البنك المركزي و حجم الشحنة ١٤٧ الف طن فراخ مجمدة يعني احمد الوكيل (و شركاة او اللي استورد الفراخ لحسابهم) يعني خد الدولار قبل التعويم و كسب فرق سعر الدولار يعني خد الدولار بسعر يعادل ٤٨ % من قيمته الحالية و خسر خزينة الدولة عن كل دولار 9.96 جنية حطهم في جيبه هو (واللي بيستورد الفراخ لحسابهم).

⏹ قرار الاعفاء الجمركي اللي صدر يوم ٢٢ نوفمبر نصه كالتالي «تُعفى من الضرائب الجمركية كميات الدواجن المجمدة التى ستستورد أو تم استيرادها خلال الفترة من ١٠/١١/٢٠١٦ حتى ٣١/٥/٢٠١٧»

⏹ القرار طلع و الفراخ في البحر قبل ما توصل للمواني المصرية يعني تاني مكسب بعد فرق سعر الدولار هو الجمارك اللي مش هيدفعها لشحنة قدرها ١٤٧ الف طن فراخ و دي تكفي مصر حوالي ٢٠٠ يوم استهلاك فراخ يعني اقل واجب جماركها تعادل حوالي
مليار جنية حطهم في جيبه و خسرتهم خزينة الدولة لصالح أحمد الوكيل (واللي بيستورد لهم الفراخ المجمدة لحسابهم) … دة احمد الوكيل طلع جامد قوي لدرجة إن الحكومة تجتمع مخصوص عشان يلغوا الجمارك قبل ما شحنته توصل للمواني!!! و كمان يتم تدبير الدولارات من البنوك تمن الشحنة قبل قرار التعويم علطول في للوقت اللي كان في ازمة دولار و اتاري البنوك كان فيها دولارات شغالة لحساب احمد الوكيل و شركاة و احنا اللي مفكرين إن حسن مالك مخبي دولارات البلد في شقته.

⏹ الف الف مبروك الفراخ الجديدة لجهاز الخدمة الوطنية نتمنى لمنافذ بيع القوات المسلحة ربح وفير ربنا يزيدكم يا باشا يعني مكسب من فرق سعر الدولار و مكسب من إعفاء جمركي غير مكسبكم في الفراخ نفسها دة غير انكم دمرتوا القطاع المدني اللي شغال في انتاج الدواجن يعني من هنا و رايح مفيش حد هينافسكم في الفراخ … الله اكبر اللهم صل على حضرة النبي خمسة و خميسة في عين الشعب الجعان اللي بياكل في بعضه عشان رغيف عيش حاف.

مهروشة يا باشا والله ابقوا استنضفوا اللي بيخططلكم الصفقات الزفرة دي … انا شخصيا مستعد اقولكم تتلعب ازاي بنضافة من غير اي ريحة نتنة خالص مقابل ١٠% بس من الارباح هتبرع بيهم للاطفال المرضى بالسرطان اللي بيموتوا من الاكل المسرطن اللي بيدخل البلد.

ملاحظة: متركزوش في احمد الوكيل او غيره كل دول مجرد ستائر ممكن تتغير أي وقت زي ابو هشيمة و ابو العنين و غيرهم.
#توحدوا
#السبوبة_حلوة
#وجهة_نظر_محترمة