أخبار عاجلة

أنا هنا مع الإنسانية

انهاردة الصبح
صحيت على حادثتين على الفيس بوك
من أسوأ ما يكون
الاتنين الجانى هو الاب او الزوج
واحد دخل على أسرة زوجته(اللى كانت رافعة غليه قضية خلع عشان هارى مراته ضرب)وراح رمى عليهم مية نار
اه بجد مية نار
انا بجد قعدت فترة مش مستوعبة كمية الغل واللا شعور اللى بقت عند إشباه الرجال دول
دمر عيلة كاملة بين الحياة والموت بما فيهم اخت مراته اللى لسة متخرجة
طب كان شعوره ايه وهو شايفهم بيبوشوا ويتقطعوا قدامه
مش عارفة الحقيقة احط ايموشن فزع والا عياط والا وجع قلب..
والتانى اخد عيلة مراته بولاده رهائن ،قتل مامتها ورماها وضربهم ضرب مبرح
انا لما شفت وشوش الستات اللى مش باين ملامحها من الورم كلمة وجع قلبى دى ولا حاجة
غير الاستشارات من ستات متضررة من أزواجهم
انا هنا مش عشان ألوم الرجالة واجى فى صف السيدات
لا
انا هنا مع الإنسانية
الإنسانية
اللى بتقول ان مش من حق حد يضرب حد
حتى لو التانى مستفز وفيه العبر
مش من حقك تضربه
مش من حق حد انه يئلم حد بالمنظر ده
لا دين ولا قانون ولا انسانية
مش من حقك
انت كدة ظاااالم قولا واحدا
عاشروهم بمعروف
او فارقوهم بمعروف
معروف يا جماعة
ويا كل ام
ارجوكى
ربى ابنك على الحنية
على احترام اخته
على أنه يكون ضهرها وسندها
ربيه على الاحترام والحوار
على احترام شعور الغير مش التريقة والاهانة واجيب اللى قدامى الأرض
كفاية بقى أشباه رجال
ربى راجل بجد
تحترمه الست من نظرة واحدة
لانها بتحبه وبتقدره
مش عارفة ابطل كلام
من وجعى على الاسرتين دول في بلدي

هتلاقي ألاف الاسر اللي بتتعرض للتنمر والاذى والقتل كل يوم في فلسطين وفي الهند وكشمير والرهونجا كونهم مسلمين
ربنا يتولاهم ويحفظهم ويعينهم ويثبتهم

فلا نملك لهم إلا الدعاء

Total Page Visits: 130 - Today Page Visits: 2

عن نافذه دمياط

اترك تعليقاً