نافذة دمياط نافذتك على أخبار وجديد محافظة دمياط
ولسه اللى جاى احلى
السيد اللواء ممدوح طه السكرتير العام المساعد لمحافظة دمياط والقائم بعمل السكرتير العام للمحافظة قام بصرف مبلغ 35 ألف جنيه منذ أيام بدل مخاطر لقيامه بالإشراف على منظومة النظافة.
إحنا مش معترضين على حصوله على المبلغ ده لأنه بالتأكيد حقه !!
ولكن من حقنا نعرف هل هو إستحق فعلا هذا المبلغ لقيامه بالإشراف بشكل فعلى على موضوع النظافة ؟
وهل تعرض لمخاطر جراء تلك المتابعة إستحق عليها هذا المبلغ؟
إحنا إعتراضنا على ان الموافقة على صرف السكرتير العام المساعد لمبلغ 35 ألف جنيه جاء بناء على قرار لجنة فض المنازعات اللى الاستاذ رجب معيزة عضو فيها وهو اللى وافق على طلب السكرتير العام المساعد على الحصول على بدل المخاطر على الرغم انه من المعتاد أن اللجنة بترفض ويقوم صاحب الطلب برفع دعوى قضائية بمحكمة القضاء الادارى ويحصل بموجبها على حكم قضائى إما بأحقيته فى الصرف أو عدم احقيته ومش هنتكلم خالص على موافقة السيد المحافظ على الصيغة التنفيذية لقرار الصرف فى نفس يوم موافقة اللجنة لإن واضح إن السكرتير العام المساعد كان مزنوق فى قرشين !!
الغريب ان رجب معيزة بصفته عضوا فى لجنة فض المنازعات فى المحافظة نفسه هو اللى وافق على طلب إبراهيم المتولى الحاصل على ماجستير على ضم مدة عامين يقال ان القائم بعمل مدير مكتب السيد المحافظ عملهم بمركز البحوث الزراعية وذلك قبل إلتحاقه بالعمل فى المحافظة حيث انه مهندسا زراعيا فى الأساس
وبموجب موافقة لجنة فض المنازعات حصل القائم بعمل مدير مكتب السيد المحافظ على الدرجة الاولى وكمان باقدمية 4 سنوات إزاى محدش عارف؟
الأغرب فى الموضوع إن رجب معيزة نفسه يعمل مديرا عاما للشئون الإقتصادية بديوان عام المحافظة تم تكليفه بتسيير أعمال مجلس مدينة دمياط على أن يكون من أولويات عمله الإرتقاء بالنظافة!!!!!
ولا شوفنا نظافة ولا شوفنا إرتقاء ولا هنشوف !!!
القصة واضحة زى الشمس إن ده مقابل الأعمال الجليلة اللى قام بها رجب معيزة وده يفسر القرار المفاجئ بإستبعاد رئيس مدينة سابق لسوء حالة النظافة وتكليف بدلا منه ولم تتغير الاحوال.
القصة واضحة زى الشمس أن عامل النظافة اللى بيطلع عين امه مقابل 300 جنيه فى الشهر وبيتعرض فعلا لمخاطر جراء العمل فى رفع القمامة وسيادة السكرتير العام المساعد هو الذى يحصل على بدل المخاطر!!
القصة واضحة مش محتاجة مفهومية ولا نناشد الاجهزة الرقابية ولا سفير إنسانية يشرح لنا ايه اللى حصل واللى بيحصل واللى هيحصل.
وللحديث بقية!!!
