الشعراء

رسالة بالصور من #اهالي_الشعراء الي مديرالامن بدمياط ( ناوي على ايه يا باشا )


 ناوى على ايه يا باشا
يعنى فعلا جاى تشتغل معانا على الارض وتطهر قرية زى الشعراء من المخدرات …؟ ولا جاى تعمل ان الشكل حلو وورق يتستف ومحاضر لعيال هبلة بتبيع على النواصى ؟


طيب تسمحلنا ندلك على حاجات مهمة بصفتنا ناس عايشين وسط القرف ده بقالنا سنين …
1_ حضرتك عاوز تعرف المشكلة بالظبط علشان توصف الحالة صح وتعالجها صح ممكن تتصل باللواء ايهاب خيرت مدير الأمن الأسبق هو كان وصل لنقطة هامة جدا ان الداخلية مخترقة بعناصر فاسدة بتبلغ بميعاد الحملة قبل نزولها وخلال ربع ساعة مبنلاقيش حد بيبيع علشان كده كان مبيبلغش عن وجهة الحملة الا لما تتحرك بفترة .

   

2 _ مشكلة الشعراء موش في شوية شباب اهبل اتجر المخدرات تعاطى ثم بيع واقف على ناصية بيبيع حجرين ولا برشامتين .. المشكلة فى الحنفية اللى فوق اللى لو وصلت ليها وقفلتها هتلاقيها نشفت تحت وعلى فكرة ممكن اصغر طفل فى الشعرا يقولك على مكان الحنفية .


3 _ من فترة بسيطة فيه شاب من انضف شباب الشعراء خالد سمره شال روحه على كفه وقرر يعمل حمله للقضاء على المخدرات و مكانش بينام والناس كلها اتفقت أنهم معاه تم اتهامه بانه عاوز يعمل فوضى وممول وإخوان و انتهت الحملة بكل حاجة حلوة فيها .. حضرتك ممكن تتواصل معاه هتفهم حاجات كتيرة جدا منه والناس كلها عندها ثقة فيه .


4 _ فيه فئة من اهل الشعراء هما موش كتير بس موجودين ومعروفين هيطبلوا و هيعملوا دخان وصاجات ورقص وطبل لاى حاجة ولاى حد الناس دى وصلوا لظباط الشرطة ان أدائهم وظيفتهم فى حفظ الأمن دى منحة وهبة موش أنها وظيفتهم وشغلهم الشاغل اهما الناس دى هيشوشروا على شغلك وهيحجبوا الرؤية عنك ويحسسوك ان كل حاجة تمام والبلد نضفت … حاول متديهمش الفرصة لده .


5_ متبنيش صورة مسبقة عن الشعراء بأن أهلها كلهم مجرمين و بلطجية زى ما هيحاولوا يوصلولك . اهل الشعراء أكتر ناس فى الدنيا ممكن يكونوا عانوا من المخدرات وحاولوا يكافحوها على مدار السنين اللى فاتت . ناس بتنام فى بيوتها مرعوبة وبتنزل من بيوتها مرعوبة بس ما باليد حيلة وصدقنى لو فيه إرادة حقيقية للتطهير هتلاقينا كلنا فى ضهر الداخلية .

فيديو لابو جنبة يوضح اسباب انتشار المخدرات

#اللهم_احفظنا_واحفظ_بلدنا #اهالي_وشباب_الشعراء