حدث معي (رد فعل الناس على زيادة سعر المترو )

اليوم بكيت بعد ما شفت رد فعل الناس على زيادة سعر المترو ..ركبت من المرج رايح حلوان وعلى شباك التذاكر ناس معهاش 7 جنية للتذكرة منهم سيدات ورجال كبار رجعوا لبيوتهم لانهم معهمش 7جنية ولما ركبت المترو تسمع قصص الناس وانينهم واحدة ست كبيرة تبكى بحرقة لان معاش الضمان بتاعها 400 جنية ولازم تروح المستشفى 3 مرات فالاسبوع يعنى محتاجة 42جنية فالاسبوع لمباشرة علاجها فالشهر 200 جنية تقريبا دة غير فلوس الدوا يعنى نص المعاش راح لتذاكر وراجل تانى من المعاشات بيروح حلوان مرتين اسبوعيا لظروف عائلية خاصة لم يوضحها والقهر باين فى عينة وشاب تانى طالب فى جامعة حلوان بيقول انا محتاج كدة عشان اروح الكلية 30 جنية 144 تذاكر + 16 مصروف اكل وابوة ميت وامة بتاخد معاش 1200 وهى اصلا مريضة بامراض مزمنة وبتحتاج ادوية كتير وراجل تانى موظف فى الوحدة المحلية مرتبة 1600 وكل اسبوع بياخد مراتة واولادة التلاتة ويروح يزور ابوة المسن يعنى المشوار الواحد بتاعهم رايح جاى محتاج 70 جنية ووحدة ست بتغسل كلى فى الجلسة الواحدة ب 400 فى المعادى مرتين فالاسبوع وتاخد ابنها يرافقها يعنى المشوار بتاعهم 28 جنية ومحتاجه 8 مرات هذا المشوار فى الشهر وهى تعيش على اعانات اخوتها لدرجة ان راجل كبير دعى على نفسة بالموت وطلب من ربنا انة ياخدة عشان يرتاح من الفقر والعوز اللى هو فية وقصص اخرى مؤلمة تجعل الانسان اللى قلبة حجر يبكى على الحال الذى وصل الية الناس ..رحمتك يارب